რა ხდება: ისევე, როგორც პრემიერობის პირველივე დღიდან, ირაკლი კობახიძე კვლავ ამბობს, რომ სამთავრობო შემადგენლობაში "არაჩვეულებრივი გუნდია" და მათთან ერთად აპირებს მუშაობის გაგრძელებას, თუმცა, მისი ეს განცხადება კეთდება იმ ფონზე, როდესაც მმართველი პარტიის მიერ პრემიერ-მინისტრად მის დანიშვნას მთავრობაში არაერთი საკადრო ცვლილება მოჰყვა.

  • თანამდებობებს მეტწილად, წინა პრემიერ-მინისტრთან, ირაკლი ღარიბაშვილთან დაკავშირებული კადრები ტოვებენ.
  • კობახიძე დღეს, 5 მარტს, მედიასთან გაკეთებული კომენტარისას ამტკიცებს, რომ "არავითარი დაპირისპირება არ აქვს" ღარიბაშვილთან, რომელსაც თანამდებობა გაუცვალა 1-ელ თებერვალს, პარტია ქართული ოცნების ყრილობაზე.

ამავე თემაზე: "კვირის ბოლომდე გავაკეთებ განცხადებას" — კობახიძე საკადრო ცვლილებებზე

ირაკლი კობახიძე: "არავითარი დაპირისპირება არ არსებობს [ღარიბაშვილთან]. რაც შეეხება საკადრო გადაწყვეტილებებს, იცით, რომ თავის დროზე მთავრობაში, უფრო დაბალ დონეზე საკადრო გადაწყვეტილებები მიიღებოდა, პირველ რიგში, პრემიერის მიერ. რაც შეეხება საკადრო ცვლილებებს, ხედავთ, რომ მინიმალური მოცულობით ხორციელდება საკადრო ცვლილებები, რაც იმაზე მიანიშნებს, რომ აბსოლუტურად ჯანსაღი ურთიერთობებია გუნდის შიგნით."

  • მისივე თქმით, "ერთადერთი სადაც დაპირისპირება და დაქსაქსულობაა, ოპოზიციის რადიკალური ნაწილია."

კობახიძე ივანიშვილზე: კობახიძე, საკადრო ცვლილებებთან დაკავშირებით, მმართველი პარტიის კონტექსტში ოცნების საპატიო თავმჯდომარე ბიძინა ივანიშვილთან მიმდინარე კონსულტაციებზე აკეთებს განსაკუთრებულ აქცენტს.

  • "ჩვენ გვაქვს კონსულტაციები გუნდის ყველა ლიდერთან. რაც შეეხება ბიძინა ივანიშვილის პოზიციას, ამას განსაკუთრებული მნიშვნელობა აქვს ჩვენთვის არამარტო იმის გამო, რომ ის ჩვენი პარტიის საპატიო თავმჯდომარე და ლიდერია, არამედ, პირველ რიგში, იმის გამო, რომ მას განსაკუთრებული დამსახურება აქვს გუნდის წინაშე და განსაკუთრებული უნარი, სწორი რჩევა მისცეს ადამიანებს", — თქვა და აღნიშნა, რომ სხვადასხვა საკითხზე მუდმივი კომუნიკაცია აქვს.

ბოლო ხაზი: მისივე თქმით, კონკრეტულ გადაწყვეტილებებზე არ საუბრობს, რადგან ეს შიდა სამზარეულოა და "აქ დეტალებზე სწორი არაა საუბარი, თორემ დასამალი არაფერია."