მოკლედ: უფლებები საქართველოს ინფორმაციით, პროკურატურამ 12 წლის ანა იანუშაიტიტეს გარდაცვალების გამოძიებაში მონაწილე ექსპერტს ბრალდება დაუმძიმა, მას ბრალი ედება მართლმსაჯულებისათვის ხელის შეშლაში, რაც, "საექსპერტო კვლევის ობიექტის დაუცველობაში და, შედეგად, ნივთმტკიცების დაზიანებაში გამოიხატა".

  • აღნიშნული ქმედება სასჯელის სახით, ოთხ წლამდე თავისუფლების აღკვეთას გულისხმობს.

დეტალები: უფლებების საქართველოს მიხედვით, 2023 წლის ოქტომბერში, პროკურატურამ ექსპერტს თავდაპირველი ბრალდება, სამსახურებრივი გულგრილობის ფაქტზე წარუდგინა (სისხლის სამართლის კოდექსის 342-ე მუხლის 1-ლი ნაწილი), რაც "სასამართლოს საშუალებას მისცემდა, დანაშაულის დამტკიცების შემთხვევაში, ექსპერტი მინიმალური სასჯელით — ჯარიმის დაკისრებით ან გაეთავისუფლებინა".

  • ოჯახისა და ადვოკატის არაერთი მიმართვის შედეგად, პროკურატურამ ბრალი დააზუსტა და 370-ე მუხლის 1-ელი ნაწილით კვალიფიცირდა.
  • უფლებები საქართველოს ინფორმაციით, ექსპერტს, აღკვეთის ღონისძიების სახით, 2500 ლარის ოდენობის გირაო შეუფარდეს. გარდა ამისა, ის სასამართლოს შემაჯამებელი გადაწყვეტილების გამოტანამდე, სასამართლო-სამედიცინო ექსპერტის თანამდებობიდან გადააყენეს.

უფლებები საქართველოს შეფასებით, 12 წლის ანის გარდაცვალებიდან ერთი წლის შემდეგაც, მომხდარის გარემოებები ბუნდოვანია, ხოლო ნივთმტკიცებები, რომელთა გამოკვლევითაც, შესაძლოა, დადგენილიყო გოგონას სხეულზე უცხო ადამიანის დნმ-ის არსებობის ფაქტი ან/და საქმისთვის მნიშვნელოვანი სხვა გარემოება, დაზიანებულია.

  • "ამ პირობებში, ოჯახი და უფლებები საქართველოს იურისტები განაგრძობენ ბრძოლას იმისათვის, რომ ანის გარდაცვალების საქმეზე სრულყოფილი გამოძიება ჩატარდეს, რისთვისაც საქმეში ევროპული ან ამერიკული საგამოძიებო უწყებების და ექსპერტების ჩართვას მოითხოვენ".

ბოლო ხაზი: 2023 წლის 17 მარტს დიდ დიღომში, იოანე პეტრიწის ქუჩასთან მდებარე ნაგავსაყრელად ქცეულ ტერიტორიაზე, 12 წლის მოზარდი ანა იანუშაიტიტე გარდაცვლილი იპოვეს. ოჯახის წევრები და ახლობლები არასრულწლოვანს 16 მარტის საღამოდან ეძებდნენ.

  • გამოძიება სისხლის სამართლის კოდექსის 109-ე მუხლით მიმდინარეობს, რაც დამამძიმებელ გარემოებაში განზრახ მკვლელობას გულისხმობს.

მსგავსი: ფოტორობოტთან დაკავშირებით, ანა იანუშაიტიტეს დედის უფლებადამცველები განცხადებას ავრცელებენ