ექსპერტ დავით გრიგოლიას, რომელსაც დიდ დიღომში გარდაცვლილი 12 წლის ანა იანუშაიტიტეს საქმეზე მტკიცებულებების დაზიანებაში ედება ბრალი, სასამართლომ 2500-ლარიანი გირაო შეუფარდა.

  • გრიგოლია, სასამართლოს გადაწყვეტილებით, ლევან სამხარაულის სახელობის ექსპერტიზის ბიუროს ექსპერტის თანამდებობიდან გათავისუფლდება.

რას ითხოვდა ბრალდების მხარე: პროკურატურა ექსპერტისთვის 5000-ლარიანი გირაოს შეფარდებას და თანამდებობიდან მის გადაყენებას ითხოვდა.

  • მოსამართლე თამარ მჭედლიშვილმა ბრალდების მხარის მოთხოვნა ნაწილობრივ დააკმაყოფილა.

რა სურდათ გოგონას დედას და ადვოკატებს : უფლებები საქართველოს ადვოკატები და ბავშვის დედა მიიჩნევდნენ, რომ ბრალდებულ ექსპერტს წინასწარი პატიმრობა უნდა შეფარდებოდა, რათა თავიდან ყოფილიყო აცილებული შემდგომი დანაშაულებრივი საქმიანობის, მოწმეზე ზემოქმედების, ან მტკიცებულების განადგურების საფრთხე.

რას ედავებიან ექსპერტს: 12 წლის გოგოს გარდაცვალების საქმეში საკვანძო მტკიცებულებების დაზიანების შესახებ უფლებები საქართველომ საზოგადოებას 2023 წლის 5 ივლისს აცნობა. საუბარია ისეთ ნივთმტკიცებებზე, რომელთა გამოკვლევითაც, შესაძლოა, დადგენილიყო გოგონას სხეულზე უცხო ადამიანის დნმ-ის არსებობის ფაქტი.

არქივიდან: დიდ დიღომში 12 წლის ანა იანუშაიტიტე გარდაცვლილი 16 მარტს იპოვეს. გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.