მოკლედ: ფოტორობოტი, რომელიც დიდ დიღომში გარდაცვლილი 12 წლის გოგოს, ანი იანუშაიტიტეს დედა ავრცელებს, არის მოწმეთა ჩვენებაზე დაყრდნობით შექმნილი, დანაშაულის ჩამდენი სავარაუდო პირის სახის რეკონსტრუქცია და ის ვერ იქნება აბსოლუტურად ზუსტი, ამის შესახებ ნათქვამია "უფლებები საქართველოს" განცხადებაში.

  • ეს ორგანიზაცია გოგოს დედის, ნატო ხუტაშვილის ინტერესებს იცავს.
  • აქვე, "უფლებები საქართველო" სთხოვს საზოგადოებას, მაღალი პასუხისმგებლობით მოეკიდოს, ამ ფოტორობოტის საფუძველზე, კონკრეტული ადამიანების სავარაუდო დამნაშავედ გამოცხადებას და თავი შეიკავონ საკუთარი ვერსიების საჯაროდ გავრცელებისგან.

დეტალები: ფოტორობოტი გოგოს დედამ, ნატო ხუტაშვილმა გუშინ გაავრცელა.

  • მისი უფლებადამცველები ამბობენ, რომ საქმის მოწმეების მიერ აღწერილი სიტყვიერი პორტრეტის საფუძველზე, შეიქმნა სავარაუდო დამნაშავის რამდენიმე ფოტორობოტი.
  • გარდაცვლილი ბავშვის დედის მიერ 26 დეკემბერს გავრცელებული ფოტორობოტი შსს-ს საექსპერტო-კრიმინალისტურმა დეპარტამენტმა 20 სექტემბერს შექმნა.

"ხაზს ვუსვამთ იმ გარემოებას, რომ მხოლოდ ფოტორობოტის საფუძველზე პირის ბრალეულობის დადგენა ვერ მოხდება. შესაბამისად, აუცილებელია, საგამოძიებო ორგანოებმა მოიპოვონ და წარმოადგინონ მტკიცებულებების ერთობლიობა, რაც სავარაუდო დამნაშავის სისხლის სამართლის პასუხისგებაში მიცემის საფუძველი გახდება", — აღნიშნულია "უფლებები საქართველოს" განცხადებაში.

ბოლო ხაზი: დიდ დიღომში 12 წლის ანა იანუშაიტიტე გარდაცვლილი 16 მარტს იპოვეს. გამოძიება სისხლის სამართლის კოდექსის 109-ე მუხლით დაიწყო, რაც დამამძიმებელ გარემოებაში განზრახ მკვლელობას გულისხმობს.