ირლანდიის სახელმწიფოს დაქვემდებარებაში მყოფი კომპანია Tourism Ireland უკვე მეორე წელია ტელეკომპანია HBO-სთან თანამშრომლობს.

კომპანიები სერიალ Game of Thrones-ზე დაფუძნებით ჩრდილოეთ ირლანდიისა და ირლანდიის რესპუბლიკის ტურისტულ კამპანიას აწარმოებენ.

კამპანიის კონცეფციის მიხედვით, ირლანდია Game of Thrones-ის ტერიტორიაა. სერიალის ნაწილს სწორედ იქ იღებენ, ხოლო ჩრდილოელი ოჯახები ირლანდიურ ტრადიციებსა და ღირებულებებზეა დაფუძნებული. სერიალის პოპულარობის გამო ირლანდიის ტურისტულმა კომპანიამ გადაწყვიტა, რომ ქვეყნის პოტენციური სტუმრების ყურადღება ამ გზით მიექცია.

ამ ვიდეოში იმ ლოკაციებს ნახავთ, რომლებზეც სერიალს იღებენ. აქ მოგზაურობისა და შესაბამისი ტურების დაგეგმვის შემთხვევაში თავს სტარკების სამფლობელოში ამოყოფთ.

ამავე კამპანიის ნაწილია მოჩუქურთმებული კარები, რომლებზეც Game of Thrones-ის მეექვსე სეზონის დასამახსოვრებელი მომენტებით შთაგონებული გრავიურები იქნება ამოტვიფრული.

კამპანიის მიმდინარეობისას 10 კარს დაამუშავებენ, რომლებიც ჩრდილოეთ ირლანდიასა და ირლანდიის რესპუბლიკაში მდებარე სხვადასხვა სასტუმროებსა და პაბებში ჩამოიკიდება.

დაიბეჭდა თემატური საფოსტო მარკებიც.

კამპანიის ფარგლებში ირლანდიური "ვალირიული ფოლადიც" შეიქმნა.

უჟანგავი და მუდამ ბასრი ვალირიული იარაღის შექმნა ირლანდიელმა მჭედლებმა ჩრდილო ირლანდიური რკინის, მეტეორიტისა და ვულკანური ობსიდიანის შერევით განიზრახეს. გამოჭედილი დანა ერთ-ერთი რესტორნის შეფმა გამოსცადა. მჭედელთა ნამუშევარი სწორედ ამ ირლანდიურ რესტორანში დაიდებს ბინას.

ეს კამპანია, მეექვსე სეზონის დასრულებამდე, ივნისის ბოლომდე გაგრძელდება.