გავრცელებული ინფორმაციით, რუსეთის იუსტიციის სამინისტრომ "უცხოელი აგენტების“ რეესტრში დაამატა ჩეჩენი უფლებადამცველი ასლან არზუევი, რომელიც გერმანიაში ცხოვრობს.

სამინისტროს ცნობით, არზუევმა გააკეთა "ისეთი მოწოდებები, რომლის შედეგებმა, შეიძლება, გამოიწვიოს რუსეთის ტერიტორიული მთლიანობის დარღვევა“, ასევე, "ავრცელებდა ცრუ ინფორმაციას, რომელიც მიზნად ისახავდა ქვეყნისა და არმიის ნეგატიური იმიჯის შექმნას“, ეწინააღმდეგებოდა ომს უკრაინაში და შექმნა მასალა "უცხოურ აგენტებთან" თანამშრომლობით.

არზუევი არის ადამიანის უფლებათა ცენტრ იჩქერიის თავმჯდომარე. ეს ორგანიზაცია დაფუძნებულია გერმანიაში; აცხადებს, რომ მხარს უჭერს ჩეჩნებს საიმიგრაციო და საკანონმდებლო პროცედურებში, ატარებს გამოძიებას და ამაღლებს ცნობიერებას ჩეჩნების პრობლემების შესახებ.

2019 წლის ოქტომბერში, არზუევმა ბერლინში, ქართველ-ჩეჩენი ზელიმხან ხანგოშვილის მკვლელობის გამოძიების მოთხოვნით, აქციები გამართა. ხანგოშვილს რუსეთის ხელისუფლება ეძებდა და რამდენჯერმე გადაურჩა მკვლელობის მცდელობებს.

ორი წლის შემდეგ, არზუევმა თქვა, რომ მისი ოთხი ნათესავი გაიტაცეს, ასევე, მისი ბიძაშვილები და ბიძა დააკავეს.

მაშინ არზუევმა დაკავებებში დაადანაშაულა როგორც ფედერალური უშიშროების სამსახურის (ეფ-ეს-ბე) ოფიცრები, ასევე, შინაგან საქმეთა დეპარტამენტის რეგიონული ხელმძღვანელი. მისი თქმით, დაკავებები პირდაპირ კავშირში იყო რუსეთის პრეზიდენტის, ვლადიმირ პუტინისა და ჩეჩნეთის მეთაურის, რამზან კადიროვის კრიტიკასთან, ასევე, ხანგოშვილის სიკვდილის გამოძიების მოწოდებებთან.

არზუევმა გატაცებას უწოდა "პუტინის ბანდის შურისძიება ადამიანის უფლებებისა და სოციალური აქტივიზმის გამო".

მას OC Media-ს თხოვნაზე კომენტარისთვის, ჯერჯერობით, არ უპასუხია.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.