მოკლედ: სახელმწიფო უსაფრთხოების სამსახურის ინფორმაციით, 15 თებერვალს დააკავეს საქართველოს მოქალაქე, რომელმაც 14 თებერვალს WIzz Air-ის ქუთაისი-ბარსელონის ავიარეისის ბორტზე ასაფეთქებელი მოწყობილობის არსებობის შესახებ ცრუ შეტყობინება გამოგზავნა.

დეტალები: სუს-ის მიხედვით, აღნიშნულმა პირმა უნგრეთში მდებარე ავიაკომპანია ვიზეარის სათავო ოფისში, სატელეფონო ზარი სხვის სარგებლობაში არსებული ქართული მობილური ოპერატორიდან განახორციელა.

  • სუს-ის კონტრტერორისტულ ცენტრში, გამოძიება ტერორიზმის შესახებ ცრუ შეტყობინების ფაქტზე, სისხლის სამართლის კოდექსის 331-ე მუხლით მიმდინარეობს, რაც 3-დან 6 წლამდე ან 6-დან 9 წლამდე თავისუფლების აღკვეთას ითვალისწინებს.

ასევე, სუსი აღნიშნავს, რომ სხვადასხვა ცრუ შეტყობინებების ფაქტზე გამოძიებას აქტიურად განაგრძობს. მათი თქმით, დაადგინეს, რომ შეტყობინებების უმეტესობა უცხო ქვეყნიდან არის გამოგზავნილი. "იდენტიფიცირებული არიან კონკრეტული პირები და ჯგუფები როგორც ქვეყნის მასშტაბით, ასევე ქვეყნის ფარგლებს გარეთ", — წერს სუსი.

  • "გვსურს ხაზგასმით აღვნიშნოთ, რომ მსგავს ფაქტებზე, კანონის შესაბამისად, სახელმწიფო უსაფრთხოების სამსახურის რეაგირება იქნება ძალზე მკაცრი", — წერს სუსი.

ბოლო ხაზი: 14 თებერვალს ავიაკომპანია Wizz Air-ის თვითმფრინავი ქუთაისიდან ბარსელონის მიმართულებით გაფრენის შემდეგ, ისევ ქუთაისის აეროპორტში მიბრუნდა, ბორტზე ასაფეთქებელი ნივთიერების შესახებ არსებული ინფორმაციის გამო.

  • თვითმფრინავის ქუთაისში დაშვების შემდეგ, სახელმწიფო უსაფრთხოების სამსახურმა, შინაგან საქმეთა სამინისტროსთან ერთად, პროტოკოლით გათვალისწინებული ყველა საჭირო და გადაუდებელი სპეციალური ღონისძიება განახორციელა.
  • ბორტზე ასაფეთქებელი მოწყობილობა ან ნივთიერება არ აღმოჩნდა.