მოკლედ: შინაგან საქმეთა სამინისტროს ინფორმაციით, თაღლითობის ბრალდებით 4 პირი დააკავეს — რესტორნის მენეჯერი და მისი თანამშრომლები. უწყების მიხედვით, ისინი საქართველოში ტურისტულად მყოფ უცხოელ მამაკაცებს შეუსაბამოდ დიდ თანხებს ახდევინებდნენ.

დეტალები: შსს-ს მიხედვით, თბილისში, ერთ-ერთი რესტორნის მენეჯერს, თანამშრომელთან ერთად, შემუშავებული ჰქონდა თაღლითური სქემა, რომლის მიხედვით:

  • "პრომო გოგონების" მეშვეობით, ერთ-ერთი აპლიკაციით უკავშირდებოდნენ საქართველოში ტურისტულად მყოფ უცხოელ მამაკაცებს, რომლებსაც წინასწარ შემუშავებული თაღლითური სქემით თავს რესტორანში აპატიჟებინებდნენ.
  • ამის შემდეგ, დანაშაულებრივი ჯგუფის წევრები მათ შეკვეთილი მომსახურების შეუსაბამოდ დიდ თანხებს ახდევინებდნენ.
  • "იმ შემთხვევაში, თუ კი დაზარალებულები ბრალდებულების მიერ დასახელებულ თანხას არ გადაიხდიდნენ, მათზე ახორციელებდნენ ფსიქოლოგიურ ზეწოლას და ამ გზით ეუფლებოდნენ ფულს", — აცხადებს უწყება.

ბოლო ხაზი: შსს-ს ცნობით, გამოძიება საქართველოს სისხლის სამართლის კოდექსის 180-ე მუხლის მე-2 და მე-4 ნაწილებით მიმდინარეობს. დანაშაული 7-დან 10 წლამდე ვადით თავისუფლების აღკვეთას ითვალისწინებს.