რა ხდება: ამოქმედდა წესი, რომლის მიხედვითაც, საავტობუსო ზოლში (ე.წ. ბასლეინი) სასკოლო ტრანსპორტის გადაადგილებაა დასაშვები, — ამის შესახებ თბილისის მერმა, კახა კალაძემ, მუნიციპალიტეტის მთავრობის სხდომაზე განაცხადა.

  • მისი თქმით, ეს ცვლილება შემუშავდა სკოლების წარმომადგენლებთან და განათლების სამინისტროსთან კონსულტაციების შედეგად.
  • ცვლილება ძალაშია 2024 წლის პირველი იანვრიდან.

დეტალები: კახა კალაძის განცხადებით, ბასლეინებით სარგებლობა შეეძლებათ როგორც კერძო, ასევე საჯარო სკოლების წარმომადგენლებს.

  • პროცედურულად: კერძო თუ საჯარო სკოლას შეუძლია, მიმართოს მუნიციპალიტეტს და მიაწოდოს ინფორმაცია სატრანსპორტო საშუალებების, მათი რაოდენობისა და მიმართულებების შესახებ. ასევე, შეათანხმოს სატრანსპორტო საშუალებების ვიზუალი.
  • ამის შემდეგ, მათ შეეძლებათ, უზრუნველყონ სკოლის მოსწავლეების ტრანსპორტირება.

ბოლო ხაზი: "იაქტიურეთ, მოგვმართეთ და ჩვენ ყველანაირად დაგეხმარებით, რომ იმ სატრანსპორტო საშუალებების სანომრე ნიშნები შევითანხმოთ, რომლითაც პატარები გადაადგილდებიან, დავარეგისტრიროთ და ავტობუსის ზოლების გამოყენება შეძლოთ", — თქვა დედაქალაქის მერმა.