მოკლედ: უკრაინის საელჩო ეხმიანება საქართველოს უსაფრთხოების სამსახურის მიერ გავრცელებულ ინფორმაციას, რომ ასაფეთქებელი მოწყობილობები, რომლებიც საქართველოში აღმოაჩინეს, რუმინეთის, ბულგარეთის და თურქეთის გავლით, უკრაინიდან, ქალაქ ოდესიდან შემოვიდა.

  • საელჩო იმედს გამოთქვამს, რომ ქართული მხარე საქმის პოლიტიზებისგან თავს შეიკავებს.

ამ თემაზე: სუს-ი ამბობს, რომ ამოიღეს ასაფეთქებელი, რომელიც ხალხმრავალ ადგილებში "მასშტაბურ მსხვერპლს გამოიწვევდა"

დეტალები: დიპლომატიურ უწყებაში აცხადებენ, რომ ამოწმებენ სუს-ის მიერ გავრცელებულ ინფორმაციას და არკვევს ყველა გარემოებას.

  • "გამოვხატავთ დაინტერესებას და მზადყოფნას კონსტრუქციული ურთიერთობისთვის სამართალდამცავ და საქართველოს სხვა კომპეტენტურ ორგანოებთან საქმის ყველა გარემოების ობიექტურად, მიუკერძოებლად და სრულყოფილად გარკვევისა და მისი რეალური ორგანიზატორების დადგენის მიზნით", — წერია განცხადებაში.

ბოლო ხაზი: სუს-მა 5 თებერვალს განაცხადა, რომ 6 ასაფეთქებელი მოწყობილობა და დიდი რაოდენობით ასაფეთქებელი ნივთიერება ამოიღეს.

  • "ექვსივე მოწყობილობა დამზადებულია მაღალი დონის სპეციალისტის მიერ და გათვლილია დაზიანების ფართო რადიუსზე. ხალხმრავალ ადგილებში მსგავსი მოწყობილობის ამოქმედება გამოიწვევდა ინფრასტრუქტურის მნიშვნელოვან დაზიანებას და მასშტაბურ მსხვერპლს", — თქვეს სუს-ში.
  • მათივე ცნობით, საქართველოში ეს მოწყობილობები თურქეთიდან შემოვიდა და მის გატანას რუსეთში, ვორონეჟში გეგმავდნენ.