ინდოეთში დაკავებული მტრედი, რომელსაც ჩინეთის სასარგებლოდ ჯაშუშობაში ბრალი ედებოდა, 8-თვიანი პატიმრობის შემდეგ გაათავისუფლეს. მტრედი მას შემდეგ გაათავისუფლეს, რაც საქმეში ცხოველთა უფლებების დამცველი ორგანიზაცია PETA აქტიურად ჩაერთო.

პოლიციელებმა მტრედი 2023 წლის მაისში დასავლეთ ინდოეთში, საპორტო ქალაქ მუმბაის მახლობლად, შენიშნეს და დაიჭირეს. მტრედს ფრთებზე ჩინური იეროგლიფები ჰქონდა მიხატული, რის გამოც პოლიციამ ის ჯაშუშად მიიჩნია და ვეტერინარიულ კლინიკაში გადაიყვანა.

ფოტო: AP

მოგვიანებით გაირკვა, რომ მტრედი ტაივანში გამართულ ფრინველების შეჯიბრში იღებდა მონაწილეობას, საიდანაც ინდოეთში მოხვდა. მტრედის იეროგლიფებიც სწორედ რბოლაში მონაწილეობაზე მიუთითებდა და ფრინველი არც ჩინეთის ჯაშუში იყო, თუმცა 8 თვე მაინც ტყვეობაში გაატარა.

აღსანიშნავია, რომ ინდოეთში მტრედების ჯაშუშობაში ეჭვი აქამდეც მიუტანიათ. 2016 წელს ინდოეთში დაიჭირეს მტრედი, რომელსაც პრემიერმინისტრ ნარენდრა მოდის მიმართ მუქარის შემცველი წერილი ჰქონდა მიმაგრებული.