48 წლის რეპერი მაიკლ რენდერი, რომლის სასცენო სახელიც Killer Mike-ია, გრემის დაჯილდოების ცერემონიაზე დააკავეს. რეპერს პოლიციამ ხელბორკილები მას შემდეგ დაადო, რაც წლევანდელ გრემიზე 3 ჯილდო მოიპოვა და სცენაზე სიტყვითაც გამოვიდა.

მიუხედავად იმისა, რომ პოლიციას დაკავების ზუსტი მიზეზი არ დაუსახელებია, განცხადებაში ნათქვამია, რომ 48 წლის რეპერი კულისებში ფიზიკური დაპირისპირების შემდეგ დააკავეს. სოციალურ ქსელებში კი გავრცელდა ვიდეო, თუ როგორ ადებენ ბორკილებს Killer Mike-ს და შენობიდან გაჰყავთ.

გრემი 2024-ის დაჯილდოებაზე Killer Mike-მა 3 ჯილდო შემდეგ კატეგორიებში მოიპოვა: წლის საუკეთესო რეპ ალბომი, წლის საუკეთესო რეპ სიმღერა და საუკეთესო რეპ შესრულება.

"20 წლის ასაკში მეგონა, რომ ნარკოდილერობა მაგარი იყო. 40 წლის ასაკში ძალიან ვნანობდი იმას, რასაც მანამდე ვაკეთებდი. 45 წლის ასაკში ამ ყველაფრის შედეგად რეპერი გავხდი. 48 წლის ასაკში კი ვდგავარ აქ, თანაგრძნობითა და სიმპათიით იმ ყველაფრის მიმართ, რაც აქამდე გამიკეთებია", — განაცხადა რეპერმა ჯილდოების მიღების შემდეგ.

დაკავების შემდეგ Killer Mike გრემის დაჯილდოების ცერემონიიდან ლოს-ანჯელესის პოლიციის დეპარტამენტში გადაიყვანეს. მომხდარის შესახებ ჯერჯერობით რეპერისა და გრემის დაჯილდოების წარმომადგენლებს კომენტარი არ გაუკეთებიათ.