რა ხდება: დღეს, 1-ელ თებერვალს, მმართველი პარტია ქართული ოცნება ყრილობას მართავს. ეს პარტიის რიგით მერვე ყრილობაა და ის უკვე მიმდინარეობს სასტუმროში პარაგრაფი თბილისი.

დეტალები: როგორც ცნობილია, 14:00-სთვის, პარტიის საპატიო თავმჯდომარე ბიძინა ივანიშვილი პოლიტსაბჭოს წარუდგენს პრემიერ-მინისტრობის ახალ კანდიდატს — ირაკლი კობახიძეს.

  • კობახიძე ქართული ოცნების თავმჯდომარის პოსტს იკავებდა 2021 წლის იანვრიდან.
  • ირაკლი კობახიძის ნაცვლად, პარტიის თავმჯდომარედ ირაკლი ღარიბაშვილს დანიშნავენ.
  • შიდა პარტიული და სამთავრობო ცვლილებები მოჰყვა ბიძინა ივანიშვილის პოლიტიკაში მესამედ მოსვლას: 2023 წლის 30 დეკემბერს ის პარტიის ყრილობას დაესწრო და ოცნებამ პარტიის საპატიო თავმჯდომარედ გამოაცხადა.

გაიგე მეტი: რა თქვა ივანიშვილმა პოლიტიკაში მესამედ დაბრუნებისას

პროცედურულად: მას შემდეგ, რაც მოქმედმა პრემიერ-მინისტრმა, ირაკლი ღარიბაშვილმა გადადგომის თაობაზე განაცხადა, კანონის მიხედვით, უფლებამოსილება შეჩერდა მინისტრთა კაბინეტის სრულ შემადგენლობას და ახლა ისინი მოვალეობის შემსრულებლები არიან.

  • სამთავრობო იმედის მიხედვით, პრემიერ-მინისტრობის ახალი კანდიდატი, ირაკლი კობახიძე სამთავრობო პროგრამას საქართველოს პარლამენტს ხვალ, 2 თებერვალს წარუდგენს.
  • კობახიძე ასევე წარადგენს პარლამენტში მინისტრთა კაბინეტის განახლებულ შემადგენლობას.
  • იმედი აცხადებს, რომ მოსალოდნელია, შეიცვალოს რამდენიმე მინისტრი.
  • საქართველოს პარლამენტს ხვალიდან, 2 თებერვლიდან ექნება მომდევნო 2 კვირა იმისთვის, რომ ნდობა გამოუცხადოს პრემიერ-მინისტრობის ახალ კანდიდატსა და მინისტრთა კაბინეტს.

კონტექსტი: მოქმედმა პრემიერ-მინისტრმა, ირაკლი ღარიბაშვილმა მოულოდნელად დატოვა პრემიერ-მინისტრობის პოსტი 29 იანვარს, დღის ხუთ საათზე.

  • მის განცხადებას წინ უძღოდა სახელისუფლებო ტელეარხის, იმედის მიერ, იმავე დღის დილით გავრცელებული ექსკლუზიური ინფორმაცია, რომლის მიხედვით, ოცნების პოლიტსაბჭოს გადაწყვეტილებით, ღარიბაშვილს პრემიერად კობახიძე შეცვლის, კობახიძეს კი ღარიბაშვილი ჩაანაცვლებს პარტიის თავმჯდომარედ.
  • ღარიბაშვილი მეორე ვადით პრემიერ-მინისტრად 2021 წელს დანიშნა ოცნების პოლიტსაბჭომ მას შემდეგ, რაც პრემიერობიდან გიორგი გახარია გადადგა.
  • მანამდე, ღარიბაშვილი ამ პოზიციას 2013-დან 2015 წლის დეკემბრამდე იკავებდა.

გაიგე მეტი: რა იყო ღარიბაშვილის პრემიერობის ბოლო სიტყვა