რა ხდება: მოძრაობამ ქართული კინო საფრთხეშია კულტურის სამინისტროსთან აქცია გამართა. ისინი აცხადებენ, რომ ამით ეხმიანებიან ეროვნული კინოცენტრის მიერ საბიუჯეტო თანხების არამიზნობრივ ხარჯვას.

დეტალები: ეს აქცია დაიგეგმა მას შემდეგ, რაც ცნობილი გახდა, რომ კინოცენტრიდან 32-წევრიანი დელეგაცია გაემგზავრება ბერლინის 74-ე საერთაშორისო ფესტივალის კინო-ბაზრობაზე (EFM).

• დელეგაციაშია კინოცენტრის ფილმწარმოების დეპარტამენტის უფროსი ბაჩო ოდიშარია და ასევე, გური სულთანიშვილიც — ორივე მათგანი, სექსუალურ ძალადობაში მხილებულ შალვა რამიშვილთან ერთად, ღიად ანტიდასავლური მოძრაობა ხალხის ძალისა და ხელისუფლებას დაქვემდებარებული არხის, POS TV-ს წამყვანები არიან.
• დელეგაციის შემადგენლობაშია კიდევ ერთი სახელისუფლებო არხის, იმედის ჟურნალისტიც.

10 შეკითხვა მინისტრ წულუკიანს: კინოცენტრის მიმართ ბოიკოტში მყოფი კინემატოგრაფისტები პასუხს სთხოვენ კულტურის მინისტრს კინოცენტრის ჩამოშლისა და მთლიანად კულტურის სექტორის დაზიანების გამო. მათ თეა წულუკიანს 10 შეკითხვით მიმართეს:

1. "იმ ფონზე, როდესაც ეროვნული კინოცენტრის არსებობის 20-წლიან ისტორიაში პირველად არ გამოცხადდა კონკურსები ფილმების წარმოებისთვის, რატომ დაფინანსდა 32-კაციანი, არაპროფესიონალებისგან შემდგარი დელეგაციის გაგზავნა ბერლინის კინოფესტივალზე საბიუჯეტო თანხებით?
2. სად გაქრა 2023 წელს სერიალებისთვის გაცემული თანხები?
3. რატომ იმართება კინოცენტრი და მისი ფეისბუქგვერდი კულტურის მინისტრის მიერ?
4. რატომ უჩერებს კინოცენტრი პროექტებს ბოიკოტში მყოფ რეჟისორებს და პროდიუსერებს?
5. რატომ ვერ დაინიშნა კინოცენტრის დირექტორი 6 თვის მანძილზე?
6. კინო სექტორის გახლეჩის გარდა, რა სარგებელი მოიტანა რეორგანიზაციამ?
7. ვინ აგებს პასუხს გელათის ფრესკების განადგურებაზე?
8. ვინ აგებს პასუხს საქართველოს ეროვნული მუზეუმისთვის და მთლიანად კულტურული მემკვიდრეობისთვის მიყენებული ზარალის გამო?
9. ვინ იზრუნებს კულტურის სფეროში, მომსახურებიდან უსამართლოდ განთავისუფლებული ასობით თანამშრომლის დაბრუნებაზე?
10. ქალბატონო მინისტრო, როდის მიხევდებით, რომ კრიტიკული აზრის მოსმენა და დიალოგი მნიშვნელოვანია?

სადაც არ უნდა წახვიდეთ, ამ კითხვებზე პასუხის გაცემა მოგიწევთ!", — თქვეს კინოცენტრთან შეკრებილმა კინოხელოვანებმა.

კონტექსტი: გუშინ, 30 იანვარს, პუბლიკამ გაავრცელა ინფორმაცია, რომლის მიხედვით, ბერლინის 74-ე საერთაშორისო კინოფესტივალის კინობაზრობაზე (EFM) კულტურის სამინისტროს დაქვემდებარებული ეროვნული კინოცენტრის სტენდს წელს 32-წევრიანი დელეგაცია წარადგენს.

• დელეგაციაში POS TV-ის წამყვანი გური სულთანიშვილი და ამავე არხის ჟურნალისტი სალომე გობრონიძე იქნებიან.
• კინოცენტრი გური სულთანიშვილს ბერლინალეზე გზავნის როგორც კინოექსპორტის სპეციალისტს, ხოლო POS TV-ის ჟურნალისტ სალომე გობრონიძეს — როგორც პიარის დეპარტამენტის თანამშრომელს.

ბოლო ხაზი: კულტურის სამინისტროსთან შეკრებილებმა, შენობაზე პროექტორის მინათების საშუალებით გადაწყვიტეს გაუშვან ფრაგმენტები ფილმიდან მონანიება: "დღეს თენგიზ აბულაძე 100 წლის გახდებოდა. ფილმ მონანიების გამოსვლიდან 40 წელი გავიდა, ჩვენ კი ისევ სტალინის გამოსახულებას და დოქსოპულოებს ვებრძვით, კვლავ გვჭირდება იმის მტკიცება, რომ ხელოვნება ცოცხალი, დამოუკიდებელი და პოლიტიკური", — აცხადებენ ისინი.

ოდიშარიას კონტექსტი: ბაჩო ოდიშარია ღიად ანტიდასავლური მოძრაობა ხალხის ძალისა და ამავდროულად, ხელისუფლებას დაქვემდებარებული სატელევიზიო არხის, POS TV-ის წამყვანია.

• გადაცემა, რომელსაც ის გური სულხანიშვილთან და სექსუალურ შევიწროებაში მხილებულ შალვა რამიშვილთან ერთად უძღვება, ხელისუფლების მაღალჩინოსანთა ანტიდასავლურ რიტორიკას იმეორებს;
• ამავდროულად, მათი გადაცემა მიმართულია ევროსკეპტიციზმის გაძლიერებისკენ
• და ხშირად განიხილავს რუსეთთან ურთიერთობის დათბობის პერსპექტივებს.
• პროპაგანდისტული არხის წამყვანი ბაჩო ოდიშარია საქართველოს ეროვნულ კინოცენტრში დააწინაურეს 2023 წლის ნოემბერში.
• იმ დროისათვის კინემატოგრაფისტები უკვე აპროტესტებენ კინოცენტრში მიმდინარე რეორგანიზაციას — აცხადებდნენ, რომ ეს არის თეა წულუკიანის მცდელობა, კულტურის სამინისტროს პოლიტიკური გავლენის ქვეშ მოექცეს ქართული კინო და "კინოცენტრის ხელთ არსებული ყველა ბერკეტი კინოსექტორზე სრულმასშტაბიანი კონტროლის დამყარებისკენ მიიმართოს".

• კინემატოგრაფისტებისთვის პრობლემურია ისიც, რომ კინოცენტრის დირექტორი არჩეულია არა კონკურსის საფუძველზე, არამედ — მინისტრის ერთპიროვნული გადაწყვეტილებით.