მოკლედ: დღეს, 30 იანვარს, პარტია ლელოს დეპუტატმა ანა ნაცვლიშვილმა საქართველოს პარლამენტში სამოქმედო გეგმა წარადგინა, სახელწოდებით — 9 ნაბიჯი ევროკავშირისკენ.

  • ლელო აცხადებს, რომ ამ ხედვების მიხედვით, ხელისუფლებაში მოსვლიდან ერთ წელიწადში შეასრულებენ ევროკომისიისგან საქართველოსთვის მიცემული რეკომენდაციების 9 პუნქტს.
ლელოს სამოქმედო გეგმის პრეზენტაცია

ლელოს სამოქმედო გეგმის პრეზენტაცია

ფოტო: ლელო

რას გულისხმობს ლელოს სამოქმედო გეგმა: სხვა საკითხებთან ერთად, ლელოს გეგმაა საქართველოში რუსული პროპაგანდისტული საინფორმაციო არხებისა და რუსული ფონდების საქმიანობის აკრძალვა, ასევე, რუსეთთან პირდაპირი ფრენების გაუქმება.

ასევე,

  • იუსტიციის საბჭოს ფუნქციებისა და ძალაუფლების შეზღუდვა;
  • მედიაწიგნიერების სავალდებულო საგნად დანერგვას სასკოლო პროგრამაში;
  • ისეთი ეროვნული ანტიკორუფციული სააგენტოს ფორმირება, რომელიც იქნება საგამოძიებო ფუნქციით აღჭურვილი დამოუკიდებელი სახელმწიფო ორგანო.
  • დეოლიგარქიზაციასთან დაკავშირებით კი აცხადებენ, რომ ამ თვალსაზრისით, მათი გეგმა ითვალისწინებს ბიძინა ივანიშვილის და მისი პარტიის ხელისუფლებიდან გაშვებას 2024 წლის არჩევნებზე. ასევე, იმისთვის, რომ "არ მოხდეს ოლიგარქიული გავლენების დაბრუნება", უნდა შეიქმნას სახელმწიფო უწყებებისაგან დამოუკიდებელი, ოლიგარქიული გავლენების პრევენციის საბჭო.
  • პარტიას, ასევე, მიაჩნია, რომ უნდა გაუქმდეს 1984 წელს მიღებული ადმინისტრაციულ
    სამართალდარღვევათა კოდექსი, რომელიც, ლელოს თქმით, რუსული და საბჭოთა პერიოდის რეპრესიული კოდექსია.
  • გეგმის მიხედვით, უფლებების დარღვევებზე მიმდინარე გამოძიებების არაეფექტურობის გამო, მთავარი პროკურორის პოლიტიკური პასუხისმგებლობის საკითხი დღის წესრიგში უნდა დადგეს, ხოლო ახალი პროკურორი ახალი კონსენსუსით უნდა აირჩეს.

ამ თემაზე: რა წერია ევროკომისიის 9 დათქმაში მართლმსაჯულების შესახებ

ბოლო ხაზი: 29 იანვარს, საქართველოს პარლამენტში, ევროკავშირის 9 რეკომენდაციასთან დაკავშირებით, სამუშაო შეხვედრა გაიმართა. შეხვედრას ესწრებოდნენ საპარლამენტო უმრავლესობისა და ოპოზიციის წევრებიც, თუმცა, ლელო შეხვედრაზე არ მივიდა.

  • მოგვიანებით, ანა ნაცვლიშვილმა განაცხადა, რომ ლელო წარადგენდა "რეალურ გეგმას" თუ როგორ უნდა გატარდეს ევროკავშირის რეკომენდაციებთან დაკავშირებული რეფორმები.