მოკლედ: მაისის სტუდენტური მოძრაობა აცხადებს, რომ თუ აკაკი ჩიქობავას და გიორგი ხასაიას არ გაათავისუფლებენ, სტუდენტების მასშტაბური საპროტესტო აქცია დაიწყება.

ხასაია და ჩიქობავა კეკელიძის ქუჩაზე, ხატიაშვილების ოჯახის გამოსახლებისას დააკავეს. პოლიციის მანქანის შუშების ჩალეწვის გამო, მათ 3-დან 6 წლამდე პატიმრობა ემუქრებათ.

  • "თუ დაკავებულებს არ გამოუშვებენ, ეს ნიშნავს, რომ ჩვენს ქვეყანაში სამართალი არ მართლობს, რომ ყველაფერი ნებადართულია, რომ ძარცვა-გლეჯა წესია, ხოლო ემპათია და სოლიდარობა — კრიმინალია", — წერია მათ მიერ გავრცელებულ განცხადებაში.

დეტალები: მაისის სტუდენტური მოძრაობა აღნიშნავს, რომ აკაკი ჩიქობავა თბილისის სახელმწიფო უნივერსიტეტის "გამორჩეული ლექტორია".

მათი თქმით, ჩიქობავა მხარს უჭერდა თსუ-ს სტუდენტებს, როდესაც ისინი საერთო სტუდენტურ საცხოვრებელს ითხოვდნენ.

  • "ის იყო, ლამის, ერთადერთი ლექტორი, რომელიც საჯაროდ და დათქმების გარეშე უჭერდა მხარს ჩვენს ბრძოლას და ჩვენთან ერთად ითხოვდა საერთო საცხოვრებელს სტუდენტებისთვის. ის ჩვენთვის საიმედო საყრდენია, რომლის გამოცლის უფლებასაც არავის მივცემთ", — წერია განცხადებაში.
  • ასევე, მაისის სტუდენტური მოძრაობა სოლიდარობას უცხადებს მათ, ვისაც "უკანასკნელი თავშესაფრიდან ასახლებენ".
  • განცხადებას, ამჟამად, თბილისის სახელმწიფო უნივერსიტეტის 178 სტუდენტი აწერს ხელს.

ჩიქობავას და ხასაიას ბრალი უკვე წარუდგინეს. მათი ადვოკატის, გური იმნაძის თქმით, სასამართლო პროცესი დღეს გაიმართება, პროკურატურა პატიმრობას ითხოვს.

დღესვე, 15 საათზე, საქალაქო სასამართლოსთან მოძრაობა ხმა საპროტესტო აქციას აანონსებს.

ბოლო ხაზი: 23 იანვარს, კეკელიძის ქუჩაზე, პოლიციამ 20 ადამიანი დააკავა, მათგან 18 — ადმინისტრაციული, ხოლო ორი, ჩიქობავა და ხასაია — სისხლის სამართლის წესით.