კოლორადოელი პასტორი, რომელსაც კრიპტოვალუტის სქემით ქრისტიანი თემისთვის $1 მილიონზე მეტის მოპარვაში ბრალი ედება, ამბობს, რომ ამის გაკეთება ღმერთმა დაავალა. პასტორმა ელი რეგალადომ და მისმა ცოლმა კრიპტოვალუტა, სახელად INDXcoin, შექმნეს. პასტორმა თავის მშობლიურ ქალაქ დენვერში მცხოვრები მრევლი დაარწმუნა, რომ თუ ამ კრიპტოვალუტას იყიდდნენ და მასში ინვესტიციას ჩადებდნენ, მალე გამდიდრდებოდნენ. პასტორის თქმით, ამის შესახებ ღმერთმა უთხრა, რაც მრევლისთვის საკმარისი არგუმენტი აღმოჩნდა.

///

ბრალდებების შესახებ ელი რეგალადომ ცოტა ხნის წინ სოციალურ ქსელებში ვიდეო გაავრცელა. პასტორმა აღიარა, რომ ბრალდებები მართალია და ცოლთან ერთად კრიპტოვალუტით მოპოვებული $1.3 მილიონი მართლაც დახარჯა.

"რამდენიმე ასეული დოლარი ჩვენი სახლის რეკონსტრუქციაზე დაიხარჯა, რისი გაკეთებაც ღმერთმა დაგვავალა. ჩვენ ღმერთის სიტყვას დავუჯერეთ და კრიპტოვალუტა გავყიდეთ" — განაცხადა პასტორმა. მისი თქმით, ისევ სჯერა, რომ "ღმერთი ფინანსურ სექტორში სასწაულს მოახდენს".

2022 წლის ივნისიდან 2023 წლის აპრილამდე INDXcoin-ის მეშვეობით ელი რეგალადომ $3.2 მილიონის ღირებულების მოგება ნახა. აქედან $1.3 პასტორმა ძვირფასი ნივთებისა და სახლის სარემონტო პროექტისთვის დახარჯა. პასტორმა ასევე $290 ათასი ეკლესიას დაახარჯა, რომელიც ონლაინ მუშაობს და ფიზიკური ადგილმდებარეობა არც კი აქვს.

ელი რეგალადო თავის მრევლს იმასაც დაჰპირდა, რომ კრიპტოვალუტით მიღებულ თანხას ქვრივთა და ობოლთა დასახმარებლად გადარიცხავდა, თუმცა გადახდების მიხედვით, არც ეს პირობა შეუსრულებია. პასტორი და მისი ცოლი სასამართლოს წინაშე რამდენიმე დღეში წარდგებიან.