2021 წლის ოქტომბერში ფილმ Rust-ის გადასაღებ მოედანზე ალეკ ბოლდუინის მიერ სარეკვიზიტო იარაღიდან ნასროლი ორი ტყვიით რეჟისორი დაშავდა, ოპერატორი კი გარდაიცვალა. მსახიობს სიცოცხლის გაუფრთხილებლობით მოსპობისთვის ბრალი წარედგინა. სასამართლო პროცესის გამართვამდე 2 კვირით ადრე, 2023 წლის აპრილში, ბოლდუინს ბრალდება მოუხსნეს, თუმცა საქმე კვლავ აღიძრა.

ნიუ-მექსიკოს პროკურატურა აპრილში აცხადებდა, რომ საქმისათვის მნიშვნელოვანი ახალი გარემოებები გამოვლინდა, რის გამოც დამატებითი გამოძიება უნდა ჩატარდეს. ბრალდების მოხსნის მიუხედავად, პროკურორი ამბობდა, რომ მსახიობი ბრალის ხელახლა წარდგენისგან დაზღვეული არ იყო.

///

ბოლდუინის ადვოკატის განცხადებით, მსახიობი ბრალს არ აღიარებს. ბოლდუინი აცხადებდა, რომ მას სასხლეტისთვის თითი არ გამოუკრავს და ოპერატორი ტრაგიკული შემთხვევის მსხვერპლი გახდა; ხოლო სასამართლო ჩანაწერები მიუთითებდა, რომ მსახიობმა არც იცოდა, გადატენილ იარაღს რომ აწვდიდნენ.

"იარაღი ცარიელი უნდა ყოფილიყო. მე მითხრეს, რომ ცარიელ იარაღს მაძლევდნენ. ერთადერთ კითხვას უნდა გაეცეს პასუხი: საიდან აღმოჩნდა გადასაღებ მოედანზე საბრძოლო ვაზნა? ვიღაცამ ნამდვილი ვაზნა ჩადო იარაღში, ვაზნა, რომელიც იქ საერთოდ არ უნდა ყოფილიყო", — განაცხადა ალეკ ბოლდუინმა.

სიცოცხლის გაუფრთხილებლობით მოსპობისთვის ბრალი გადასაღებ მოედანზე იარაღზე პასუხისმგებელ პირს, ჰანა გუტირეს-რიდსაც წარედგინა. თუ მსახიობს ბრალი დაუმტკიცდა, მას 18 თვით თავისუფლების აღკვეთა ემუქრება.