"გაოცებული ვარ, რომ 21-ე საუკუნეში საქარველოს სუვერენიტეტის ასეთი უხეში დარღვევა ხდება, მისი მეზობლის მიერ. აშშ-სთვის ეს მიუღებელია", - ეს განცხადება ამერიკის ელჩს საქართველოში, იან კელის ეკუთვნის, რომელიც სოფელ ყარაფილაში, საოკუპაციო ხაზთან მივიდა, იქ სადაც მთავარი მაგისტრალიდან რამდენიმე ასეულ მეტრშია დამონტაჟებული ე.წ. საზღვრის აღმნიშვნელი ბანერი.

ელჩს ადგილზე ვითარება სუს-ის საინფორმაციო-ანალიტიკური დეპარტამენტის უფროსის მოადგილემ, კახა ქემოკლიძემ გააცნო. იან კელის თქმით, აშშ არასდროს აღიარებს საქართველოს ტერიტორიების ოკუპაციას, ისევე, როგორც არ აღიარა ბალტიის ქვეყნების შეერთება საბჭოთა კავშირთან:

"შტატები ამაზე საუბარს გააგრძელებს ხმამაღლა და ხმას აიმაღლებს ამის წინააღმდეგ, რომ მიუღებელია ნებისმიერი საერთაშორისოდ აღიარებული საზღვრების ცალმხრივი შეცვლა და თავიდან განსაზღვრა. რაც ხდება არის ხელოვნური და ის, რაც ადამიანებს ჰყოფს დიდხანს არ გაგრძელდება. ეს არის საქართველოს სუვერენიტეტის დარღვევა. რაც შეეხება ამ საკითხის მოგვარებას, ეს არის პრაგმატული მიდგომები რაც საქართველოს მხარეს აქვს, მეტი პროგრესი ჟენევის მოლაპარაკებებში, მეტი საუბარი ამაზე და თანმიმდევრული ქმედება."