მექსიკელი მსახიობი ანა ოფელია მურგია, რომელიც დისნეის ცნობილ ანიმაციაში Coco ბებია კოკოს პერსონაჟს ახმოვანებდა, 90 წლის ასაკში გარდაიცვალა.

მსახიობს 2011 წელს მექსიკის კინოინდუსტრიაში შეტანილი განსაკუთრებული წვლილისთვის სპეციალური ჯილდო გადაეცა. მის გარდაცვალებას მექსიკის სახვითი ხელოვნებისა და ლიტერატურის ეროვნული ინსტიტუტი გამოეხმაურა.

"ღრმა მწუხარებით გატყობინებთ ანა ოფელია მურგიას გარდაცვალების შესახებ, რომელიც მექსიკის ეროვნული თეატრის მსახიობი იყო და რომლის კარიერამაც უმნიშვნელოვანესი როლი ითამაშა მექსიკის სასცენო ხელოვნების განვითარებაში", — განაცხადა ინსტიტუტმა.

ბებია კოკოს პერსონაჟი, რომელსაც მსახიობი ახმოვანებდა, ანიმაციის ერთ-ერთი ცენტრალური ფიგურა იყო. კოკოს ერთ-ერთი ყველაზე დასამახსოვრებელი მომენტი ის სცენაა, როდესაც ბებია და მისი შვილიშვილი მიგელი Remember Me-ის მღერიან.