მოკლედ: რუსეთის თავდაცვის მინისტრმა სერგეი შოიგუმ განაცხადა, რომ რუსულმა ჯარებმა დაიკავეს აღმოსავლეთ უკრაინაში მდებარე ქალაქი მარიინკა — ეს განცხადება მაშინვე უარყო კიევმა.

რატომ არის მნიშვნელოვანი: მარიინკა, რომელიც დონეცკის კარიბჭედ არის მიჩნეული, თითქმის მთლიანად განადგურდა.

  • ქალაქს უკრაინა თავდაცვით ბარიერად იყენებს 2014 წლიდან, როდესაც რუსეთის მიერ მხარდაჭერილმა მებრძოლებმა დაიკავეს აღმოსავლეთ დონეცკის და ლუჰანსკის რეგიონების დიდი ნაწილი.

დეტალები: შოიგუმ რუსეთის პრეზიდენტ ვლადიმერ პუტინს უთხრა, რომ არმიამ შეძლო "ძლიერად გამაგრებული" ტერიტორიის აღება, დონეცკის მახლობლად.

თუმცა, უკრაინის სამხედრო სპიკერმა, ოლექსანდრ შტუპუნმა თქვა, რომ "ბრძოლა მარიინკასთვის"კვლავ გრძელდება.

"არასწორია განცხადება, რომ მარიინკა სრულად აქვთ დაკავებული რუსებს. ჩვენი ჯარისკაცები, ამჟამად, მარიინკას ადმინისტრაციულ საზღვრებში იმყოფებიან", - თქვა შტუპუნმა.

  • მანამდე უკრაინელი სამხედრო ბლოგერები იტყობინებოდნენ, რომ უკრაინული ჯარები დასავლეთ მარიინკას მცირე ტერიტორიაზე რჩებოდნენ.