10 გზა, როგორ ვიზეიმოთ ახალი წელი პიროტექნიკის გარეშე

რამდენიმე წლის წინ, ახალი წლის დილას, სოციალურ ქსელებში შემაძრწუნებელი ამბავი გავრცელდა თანდართული აპოკალიფსური ფოტოთი — როგორ დაიფარა რომის ქუჩები დახოცილი ჩიტებით სადღესასწაულო ფეიერვერკის შემდეგ. ზოგს ეს ამბავი ყალბი ინფორმაციაც ეგონა, მაგრამ ყველა ეჭვი მალევე გაიფანტა და დადასტურდა, რომ ასობით ფრინველის დახოცვა სწორედ საახალწლოდ ატეხილ ბათქაბუთქს მოჰყვა.

მხოლოდ ეს შემთხვევაც გამოდგებოდა იმის დასამტკიცებლად, რომ ფეიერვერკი ცოცხალ სამყაროს უზარმაზარ ზიანს აყენებს. გარეული ცხოველები ხმაურზე ხშირად ტოვებენ საცხოვრებელს და გზააბნეულნი გარბიან; მათი ნაწილი იღუპება: ზოგი შიშით, ზოგიც — პიროტექნიკით გაჩენილი ხანძრით. არც გადარჩენილები არიან კარგ დღეში: უზიანდებათ სმენა და მხედველობა. ამასთან, ფეიერვერკის ხმა ძალიან სტრესულია შინაური ცხოველებისთვის, განსაკუთრებით — მიუსაფარი ცუგებისა და ფისოებისთვის. ამ ყველაფერთან ერთად კი, პიროტექნიკა, რა თქმა უნდა, ვნებს ადამიანსაც, რადგან მისი გამოყენების შედეგად გამოყოფილი ქიმიური და მომწამვლელი ნივთიერებები ხვდება ჩვენს სასუნთქ ჰაერში, წყალსა და საკვებშიც კი.

რადგან შევთანხმდით, რომ პიროტექნიკის გამოყენება არ ღირს, დროა, ალტერნატივის მოძიებაზეც ვიზრუნოთ. ეს კი სულაც არაა რთული ამბავი: ახალი წლის აღსანიშნად იმაზე მეტ სახალისო გზა არსებობს, ვიდრე გგონია. მათგან რამდენიმე ქვემოთაა ჩამოთვლილი.

1. იცეკვე, იმღერე...

არაფერი ქმნის სადღესასწაულო განწყობას ისე, როგორც მუსიკა. თუმცა, უფრო გაერთობი, თუკი მხოლოდ მოსმენას არ დასჯერდები და იცეკვებ, ან სულაც კარაოკეზე იმღერებ. და სულ არ აქვს მნიშვნელობა, როგორი პლასტიკა ან ვოკალი გაქვს, ეს ხომ ახალი წელია!

2. მოაწყვე კოსტიუმირებული წვეულება

კიდევ იცი, რა უხდება ახალ წელს განსაკუთრებულად? კარნავალი! თემატური კოსტიუმირებული წვეულების მოწყობა სადღესასწაულოდ მისწრებაა: განსაკუთრებით, თუ დიდი ოჯახი გყავს ან სამეგობროსთან ერთად ზეიმობ. წვეულების თემატიკა კი იმდენნაირი შეიძლება იყოს, რამდენიც გსურს: ზღაპრები, ბეჭდების მბრძანებელი, ჰარი პოტერი...

3. ყველაფერი კონფეტით დაფარე

კონფეტი, იგივე ფერადი ფურცლების წვიმა, ნებისმიერი წვეულების განუყრელი ნაწილია, ასე რომ, საყიდლების სიას აუცილებლად უნდა მიამატო. თანაც, ფეიერვერკის მშვენიერი ალტერნატივაა — უსაფრთხო გამოსაყენებელია, მათ შორის, შიდა სივრცეში. ერთი ისაა, რომ მერე ყველაფრის დალაგება მოგიწევს...

4. ოთახი ორიგინალური განათებით მორთე

საახალწლოდ სახლს ისედაც ვრთავთ გირლანდებითა და კედლებზე ჩამოკონწიალებული "ჯონჯოლისებური" განათებით, მაგრამ საქმეს თუ უფრო კრეატიულად მიუდგები, უკეთეს შედეგს მიიღებ: რას იტყვი, მაგალითად, კოსმოსური სანათის შეძენაზე? ეს ჯადოსნური ნივთი მთელ შენს ოთახს გალაქტიკებსა და ვარსკვლავებს შორის მოაქცევს. ამის ფონზე კი საჩუქრებიც შეგიძლიათ გახსნათ.

///

5. მოიმარაგე სასუსნავი და მოაწყვე საყვარელი ფილმების მარათონი

როცა საახალწლო სუფრაც მოგბეზრდება, ცეკვაც და საჩუქრების გახსნასაც მოამთავრებ, შეიძლება მოიწყინო. სწორედ მაშინ დგება საყვარელი საახალწლო ფილმების მარათონის მოწყობის დრო; შესაძლოა, მარტო სახლში უკვე ზეპირად იცი, მაგრამ მერე რა?! ან თუ არჩევანს ჰარი პოტერზე შეაჩერებ, ბედობასაც ჰოგვორტსში შეიძლება შეხვდე...

6. გაერთე სამაგიდო თამაშებით

შეიძლებოდა გვერჩია, საყვარელ ვიდეოთამაშს ჩაუჯექიო, მაგრამ რადგან ახალი წელი ის იშვიათი დღეა, როცა მთელი ოჯახი ან სამეგობრო იკრიბება, თამაშიც ერთად ჯობს. იაპონური ჯოკერი იქნება ეს, მაგიდის ფეხბურთი თუ სულაც ნარდი — ნებისმიერი მათგანი ბევრად სახალისოა, როცა საყვარელ ადამიანებთან ერთად თამაშობ (რასაკვირველია, ჯუმანჯის გარდა). სამაგიდო თამაშების შერჩევაში თუ დახმარება გჭირდება, ამ სტატიას შეგიძლია მიაკითხო.

7. გაისეირნე ქუჩებში (ცხელი სასმლით ხელში)

რა ჯობია სადღესასწაულოდ მორთულ ქუჩებში სეირნობას?! არ ვიცით, შენს ქალაქში თუ ითოვებს ახალი წლის ღამეს, მაგრამ გასეირნება მაინც მშვენიერი აზრია. თან, გზად შეიძლება კონცერტზეც აღმოჩნდე. რაც მთავარია, თბილად ჩაცმა და საიმედოდ დახურული ჭურჭლით ცხელი შოკოლადის გაყოლება არ დაგავიწყდეს.

8. შუშხუნები, ბევრი შუშხუნა!

შუშხუნები პიროტექნიკის კიდევ ერთი მშვენიერი შემცვლელია. მათი (სწორად) გამოყენებით არც შენ დაშავდები და გარემოსაც არ მიაყენებ ზიანს. ახალ წლამდე დარჩენილი წამების უკუათვლისას აელვარებული შუშხუნები კი ამ განსაკუთრებულ მომენტს კიდევ უფრო მეტ ჯადოსნურობას შესძენს.

///

9. გაიხსენე გასული წელი ფოტოებით

შეიძლება განვლილი წლით მაინცდამაინც კმაყოფილი არ იყო, მაგრამ ბოლო თორმეტ თვეში უთუოდ მოიძებნება ისეთი მომენტები, რომელთა გახსენებაც ღირს. განსაკუთრებულ მომენტებს კი ყველაზე უკეთ ფოტოები ინახავს, ასე რომ, ჩაუჯექი შენი ტელეფონის ფოტოალბომს და გადაარჩიე სურათები. ამ დროს შეიძლება ისეთ ფოტოსაც გადააწყდე, რომელიც უკვე დავიწყებული გქონდა, მისმა გახსენებამ კი ღიმილი მოგგვაროს. ისე, სურათების ამობეჭდვა და ალბომის გაკეთება ან დღიურში მათი ჩაწებებაც არაა ურიგო აზრი...

10. ჩამოწერე ახალი წლის გეგმები

რაც უნდა იყოს, ახალ წელს მაინც უკეთესის იმედით და გეგმების უცილობლად შესრულების დაპირებით ვხვდებით ხოლმე. ჰოდა, მთელი ამ სადღესასწაულო ორომტრიალის ფონზე, შეგიძლია მშვიდად ჩამოჯდე და მომავალი წლის გეგმები ჩამოწერო. მაგალითად, ახალი ენის შესწავლაზე რას იტყოდი?

ბონუსი: თუ მაინც ვერ ელევი ფეიერვერკს, ვიდეოდ ჩართე

რატომღაც თუ მაინც მოგწონს მთელი ეს ბათქაბუთქი, შეგიძლია იუთუბზე მოიძიო ფეიერვერკის კადრები (თანაც, 4K ხარისხში) და ის ჩართო ტელევიზორში. სხვა თუ არაფერი, ამით საკუთარ თავსაც გაუფრთხილდები, სხვებსაც და გარემოსაც.

ჩვენ კი ისღა დაგვრჩენია, ბედნიერი ახალი წელი გისურვოთ!