რა ხდება: საქართველოში გაუჩინარებული აქტივისტი რაფაილ შეპელევი რუსეთში, ნიჟნი-ტაგილის წინასწარი დაკავების იზოლატორშია მოთავსებული და ტერორიზმში სდებენ ბრალს, ინფორმაციას რუსული უფლებადამცველი ორგანიზაცია პერვი ოტდელი წერს.

  • მათ განცხადებაში წერია, რომ შეპელევი რუსი სამართალდამცველების პროვოკაციის მსხვერპლი გახდა.
  • "მათ მოტყუებით გადაიყვანეს შეპელევი თბილისიდან ცხინვალის რეგიონში, იქ დააკავეს, გადაიყვანეს ვლადიკავკაზში, შეუფარდეს ადმინისტრაციული პატიმრობა და აღძრეს სისხლის სამართლის საქმე, შემდეგ კი ნიჟნი-ტაგილის წინასწარი დაკავების იზოლატორში გადაიყვანეს", — წერია განცხადებაში.
  • მათივე ცნობით, ეტაპირება თითქმის თვენახევარი გაგრძელდა — მინვოდის, ვოლგოგრადის, სარატოვის, ყაზანის, იჟევსკის, პერმის და ეკატერინბურგის გავლით. ნიჟნი-ტაგილში აქტივისტი გასულ კვირას ჩაიყვანეს.
  • "პერვი ოტდელის" ცნობით, შეპელევს ბრალდება წარუდგინეს ტერორისტული ორგანიზაციის საქმიანობაში მონაწილეობის მუხლით, რომელიც 10-დან 20 წლამდე პატიმრობას ითვალისწინებს და ასევე, "ტერორიზმის გამართლების" მუხლით, რომლის პატიმრობის ზომა 5-დან 7 წლამდე ვადით განისაზღვრება.

რა ვიცით რაფაილ შეპელევის გაუჩინარების შესახებ: რუსეთში აკრძალული ულტრამემარცხენე ორგანიზაცია "არტპოდგოტოვკას" წევრი თბილისიდან, ბინიდან 12 ოქტომბერს გავიდა.

  • საქართველოს შინაგან საქმეთა სამინისტროს ინფორმაციით, შეპელევის ძებნა მისი გაუჩინარების შესახებ შეტყობინების მიღებისთანავე დაიწყეს.
  • გაესაუბრნენ ყველას, ვისაც შეიძლებოდა მასზე რაიმე ინფორმაცია ჰქონოდა.
  • დაათვალიერეს ვიდეოსამეთვალყურეო კამერების ჩანაწერები, რომლითაც დასტურდება, რომ 12 ოქტომბერს შეპელევი მისი საცხოვრებელი მისამართიდან ჯერ გორში, შემდეგ კი — ტაქსით სოფელ კირბალის მიმართულებით წავიდა.
  • ტაქსის მძღოლისა და ადგილობრივი მაცხოვრებლების ინფორმაციით, რუსმა აქტივისტმა, ტაქსიდან გადასვლის შემდეგ, საკუთარი ნებით გადაკვეთა საოკუპაციო ხაზი და გაემართა ოკუპირებული ტერიტორიის სიღრმისკენ.
  • შსს-მ საქმე გამოძიება თავისუფლების უკანონოდ აღკვეთის მუხლით აღძრა.

ბოლო ხაზი: რაფაილ შეპელევი რუსი აქტივისტია, რომელიც წარსულში რამდენჯერმე დააკავეს საპროტესტო აქციების დროს, მათ შორის - ალექსეი ნავალნის მხარდასაჭერ აქციაზე.

  • შეპელევი საქართველოში საცხოვრებლად 2021 წელს გადმოვიდა.