რა ხდება: რუსეთში აკრძალული ულტრამემარცხენე ორგანიზაცია "არტპოდგოტოვკას" წევრი, რაფაილ შეპელევი, რომელიც გასულ თვეს თბილისიდან გაუჩინარდა, შესაძლოა, რუსეთის ციხეში იყოს.

დეტალები: მათივე ცნობით, შეპელევი თბილისში, ბინიდან 12 ოქტომბერს გავიდა და მას შემდეგ არავის უნახავს. ახლობლების თქმით, ის რუსეთში დაბრუნებას არ გეგმავდა.

  • მომდევნო დღეს, ვლადიკავკაზის სასამართლომ, ვებგვერდზე გამოაქვეყნა ინფორმაცია, რომ რაფაილ შეპელევი დამნაშავედ ცნეს წვრილმან ხულიგნობაში.
  • პირველი განყოფილება წყაროებზე დაყრდნობით წერს, რომ შეპელევი რუსეთში დააპატიმრეს და წინასწარი დაკავების საკანშია მოთავსებული. მას ბრალად ტერორიზმთან დაკავშირებული დანაშაულის ჩადენა ედება.

დამატებითი ცნობები: ფონდი თავისუფალი რუსეთი ავრცელებს ინფორმაციას, რომ შეპელევი, შესაძლოა, რუსმა სამხედროებმა გორის მუნიციპალიტეტში, სოფელ კირბალში დააკავეს.

ისინი საქართველოს შს სამინისტროზე დაყრდნობით წერენ, რომ

  • 10 ოქტომბერს, რაფაილ შეპელევი გაემგზავრა სოფელ კირბალში ტაქსით, იმყოფებოდა საოკუპაციო ხაზთან ახლოს.
  • ტაქსიში მისი ჩაჯდომის მომენტი ასახულია ვიდეოკადრებზე, რომელიც სათვალთვალო კამერებიდან ამოიღეს.
  • პოლიციას აქვს ტაქსის მძღოლის ჩვენებაც, რომელმაც შეპელევი კირბალში მიიყვანა და ასევე, ჩვენება მისცეს სოფლის მცხოვრებლებმაც.
  • თავისუფალი რუსეთი წერს, რომ ადგილობრივებმა პოლიციას უთხრეს, რომ დაინახეს ეკლესიისკენ მიმავალი შეპელევი, იქ იმყოფებოდნენ რუსი ოკუპანტებიც.
  • მოსახლეობამ დაინახა, რომ შეპელევი მივიდა რუს ჯარისკაცებთან, რის შემდეგაც ის რუსეთის მიერ ოკუპირებულ ტერიტორიაზე გადაიყვანეს.

On.ge ინფორმაციის გადასამოწმებლად შსს-ს დაუკავშირდა, თუმცა უწყებაში კომენტარს, ჯერჯერობით, არ აკეთებენ.

რაფაილ შეპელევი ეკატერინბურგიდან არის. რუსეთში, უფლებადამცველი ჯგუფის, OVD-Info-ს ცნობით, ის რამდენჯერმე დააკავეს წარსულში, საპროტესტო აქციების დროს, მათ შორის - ალექსეი ნავალნის მხარდასაჭერ აქციაზე.

  • შეპელევი საქართველოში საცხოვრებლად 2021 წელს გადმოვიდა.