რა ხდება: პროკურატურა არ ეთანხმება თბილისის საქალაქო სასამართლოს გადაწყვეტილებას, რომლითაც გენდერული ნიშნით, დისკრიმინაციის მოტივით, ცემის, მუქარის და ნარკოტიკული საშუალებების უკანონო შეძენა შენახვის ფაქტებზე ბრალდებულ კახა აბუაშვილს, იმავე — კაბუს, აღკვეთის ღონისძიების სახით გირაო შეეფარდა.

  • პროკურატურა გადაწყვეტილებას სააპელაციო წესით გაასაჩივრებს.

რა გადაწყვეტილება მიიღო სასამართლომ: კაბუს 10 000-ლარიანი გირაო შეეფარდა.

  • ის პენიტენციურ დაწესებულებას გირაოს თანხის გადახდის შემდეგ დატოვებს.
  • გადაწყვეტილება მოსამართლე თამარ მჭედლიშვილმა მიიღო.
  • საქმეზე სასამართლო განხილვები გაგრძელდება

რაში ედება ბრალი კაბუს: გამოძიებით დადგინდა, რომ 25 ნოემბერს მან, მანქანით გადაადგილებისას, მასთან ერთად მყოფ ქალს ფეხის არეში ტარი ჩაარტყა, ასევე, ხელი რამდენჯერმე გაარტყა.

  • ბრალდებული დანის დემონსტრირებით, ჯანმრთელობის დაზიანებით და დასახიჩრებით დაემუქრა დაზარალებულს და გახსნილი დანა მისი მიმართულებით ორჯერ მოიქნია.
  • ქალმა მოახერხა, გაჩერებულ საპატრულო მანქანასთან მიახლოებისას, მანქანის კარი გამოეღო და პოლიციისთვის დახმარება ეთხოვა.
  • პოლიცია კახა აბუაშვილს დაედევნა, შეაჩერეს და ადგილზე დააკავეს.
  • ამასთან, გამოძიებით დადგენილია, რომ აბუაშვილმა უკანონოდ შეიძინა და ინახავდა ორ ცალ პოლიეთილენის ჩამკეტიან პაკეტში მოთავსებულ ნარკოტიკულ საშუალება ალფა-პვპ-ს, საერთო წონით - 1,28 გრამს.