რა ხდება: მომღერალ და მსახიობ კახა აბუაშვილს (კაბუ) პროკურატურამ ქალის მიმართ ძალადობის, მუქარის და ნარკოტიკული საშუალების უკანონო შეძენა-შენახვის ფაქტზე ბრალდება წარუდგინა.

  • ინფორმაციას პროკურატურა ავრცელებს.

გამოძიების დეტალები: დადგინდა, რომ 25 ნოემბერს, თბილისში, ავტომანქანით გადაადგილებისას, კაბუმ მასთან ერთად მყოფ ქალს ფეხის არეში დანის ტარი ჩაარტყა და ასევე, ხელი რამდენჯერმე გაარტყა, რის შედეგადაც, ქალმა ფიზიკური ტკივილი განიცადა და სხეულის დაზიანება მიიღო.

  • გარდა ამისა, ბრალდებული, დანის დემონსტრირებით, ჯანმრთელობის დაზიანებით და დასახიჩრებით დაემუქრა დაზარალებულს და გახსნილი დანა მისი მიმართულებით ორჯერ მოიქნია.
  • კახეთის გზატკეცილზე მსვლელობისას, შსს საპატრულო პოლიციის დეპარტამენტის შენობის მიმდებარედ, ქალმა შენიშნა გაჩერებული საპატრულო პოლიციის ავტომანქანა, მანქანის კარი გააღო და პოლიციას დასახმარებლად მოუწოდა.
  • პოლიციელები აბუაშვილს დაედევნენ, შეაჩერეს ავტომანქანა და ქალის მითითებით, კაბუ ადგილზე დააკავეს.
  • ამასთან, გამოძიებით დადგენილია, რომ კახა აბუაშვილმა უკანონოდ შეიძინა და ინახავდა ორ ცალ პოლიეთილენის ჩამკეტიან პაკეტში მოთავსებულ ნარკოტიკულ საშუალება ალფა-პვპ-ს, საერთო წონით - 1,28 გრამს.
  • სამართალდამცველებმა ბრალდებული იმავე დღეს დააკავეს.
  • მას ბრალი რამდენიმე მუხლით წარედგინა — გენდერული ნიშნით დისკრიმინაციის მოტივით ცემა, რამაც დაზარალებულის ფიზიკური ტკივილი გამოიწვია, გენდერული ნიშნით დისკრიმინაციის მოტივით ჯანმრთელობის დაზიანების მუქარა და ნარკოტიკული საშუალების უკანონო შეძენა, შენახვა.
  • პროკურატურა ბრალდებულების მიმართ აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს.