რუსი სამხედროების მიერ ქარელის რაიონში საზღვრის აღმნიშვნელი ბანერების დადგმას საპარლამენტო უმრავლესობის წევრმა, გია ვოლსკიმ წმინდაწყლის პროვოკაცია უწოდა:

"მგონია, რომ ივლისის ბოლოს დაგეგმილ შეხვედრაზე, რომელიც უსაფრთხოების პრევენციის საკითხებზე შედგება, ეს საგანგებო განხილვის თემა უნდა იყოს".

ერთიანი ნაციონალური მოძრაობის წევრი, სერგო რატიანი კი ამბობს, რომ ყოველი მსგავსი ქმედების შემთხვევაში მთელი მთავრობა მობილიზებული უნდა იყოს:

"ჩვენს პარტნიორებს გაცილებით უფრო ინტენსიურად უნდა აწუხებდნენ იმისთვის, რომ რუსეთმა ფასი გადაიხადოს. ამას ვერ ახერხებს მთავრობა, ფაქტობრივად ისინი სტატისტები არიან და ეს უუნარობა უნდა დასრულდეს, რაც შეიძლება მალე".

თავისუფალი დემოკრატების წევრმა, ზურაბ აბაშიძემ კი განაცხადა, რომ საერთაშორისო ჩართულობა და მონიტორინგი ამ მიმართულებით კიდევ უფრო უნდა გაძლიერდეს:

"მაქსიმალური ზეწოლა უნდა მოხდეს საქართველოს მხრიდან საერთაშორისო მხარდაჭერით, ყველა შეხვედრაზე, ყველა საერთაშორისო ფორუმზე. ეს იქნება ვარშავის, ეს იქნება ევროპარლამენტი თუ ევროკავშირი".

დღეს, 8 ივნისს, ქარელის რაიონში, სოფელ ავლევის ტერიტორიაზე, იქ სადაც მოსახლეობა ხორბალს თესავს და სასოფლო სამეურნეო საქმიანობას ეწევა, რუსმა სამხედროებმა საზღვრის აღმნიშვნელი ორი ახალი ბანერი დაამონტაჟეს.

ქარელის რაიონში რუსმა სამხედროებმა ახალი ბანერები დადგეს