ნეტფლიქსზე ფენტეზის ჟანრის სერიალი Shadow and Bone ("აჩრდილი და ძვალი") ორი სეზონის შემდეგ დაიხურა. სერიალის პოპულარობის მიუხედავად, შეწყდა მუშაობა მის სპინ-ოფზეც, რომლის სცენარი უკვე დასრულებული იყო.

Shadow and Bone-თან ერთად, ნეტფლიქსმა არაერთი სხვა სერიალიც დახურა. გადაწყვეტილებას წინ უძღოდა აშშ-ში სცენარისტებისა და მსახიობების რამდენიმეთვიანი გაფიცვა.

აჩრდილი და ძვალი ამერიკელი მწერლის, ლი ბარდუგოს, ფენტეზი საგის ეკრანიზაცია იყო. მისი პრემიერა ნეტფლიქსზე 2021 წელს შედგა და მაშინვე დაიმსახურა მაყურებლის სიყვარული — გამოსვლიდან ოთხი კვირის განმავლობაში სერიალი 55-მა მილიონმა მომხმარებელმა ნახა.

თავისი წიგნების ეკრანიზაციის დახურვას გამოეხმაურა ლი ბარდუგოც. მწერალმა ინსტაგრამზე დაწერა, რომ "გულგატეხილი და იმედგაცრუებულია", ამასთან, მადლობა გადაუხადა სერიალზე მომუშავე გუნდსა და გულშემატკივრებს.

"მეგობრებო, ალბათ უკვე იცით, რომ Shadow and Bone-ის მესამე სეზონი და Six of Crows-ის სპინ-ოფი აღარ იქნება", — წერს ბარდუგო, — "გულგატეხილი და იმედგაცრუებული ვარ, მაგრამ ვცდილობ, მადლიერების გრძნობა შევინარჩუნო. მწერლების უმეტესობას თავისი შემოქმედების ადაპტაციის ხილვის საშუალება არასდროს ეძლევა. ბევრიც ნანობს ამას. მე კი გამიმართლა, რომ ეკრანიზაციას სიამაყითა და სიხარულით შემიძლია შევხედო".

Shadow and Bone-ში ისტორია მთავარი გმირის, ალინას, გარშემო ვითარდება, რომელიც აღმოაჩენს რომ მაგიურ ძალას ფლობს — დაიცვას სამყარო წყვდიადში შთანთქმისგან, რითაც არზღვიდან მოსული ურჩხულები იმუქრებიან. სერიალში მთავარ როლებს ბენ ბარნსი, ჯესი მეი ლი, ამიტა სუმანი და ფრედი კარტერი ასრულებენ.

ბარდუგოს სლავური ფოლკლორის ელემენტებით გაჯერებული წიგნების სერია, რომელიც ტრილოგიასა და ორ ორწიგნეულს მოიცავს, დიდი პოპულარობით სარგებლობს ახალგაზრდა მკითხველში. სერიას გრიშავერსის სახელითაც მოიხსენებენ, რადგან მოქმედება გრიშების სამყაროში ხდება, სადაც მცხოვრებლები განსაკუთრებულ მაგიას — მცირე მეცნიერებას — ეუფლებიან.

The Guardian-ის მიერ ფენტეზის დედოფლად წოდებული ლი ბარდუგოს შექმნილი წიგნები მილიონობით ეგზემპლარადაა გაყიდული და თარგმნილია ათობით ენაზე, მათ შორის, ქართულადაც.