ამერიკელმა მილიარდელმა და მსოფლიოს ერთ-ერთმა ყველაზე მდიდარმა ადამიანმა, უორენ ბაფეტმა ქველმოქმებაზე 3,17 მილიარდი ამერიკული დოლარი გაიღო. ქველმოქმედების შესახებ ინფორმაცია გუშინ, 10 ივლისს CNBC-მა გავრცელა.

როგორც ცნობილი ხდება, მილიარდელმა შემოწირულობა კომპანია Berkshire Hathaway აქციების სახით გაიღო. იმ ხუთ ფონდს შორის, სადაც შემოწირულობა გადანაწილდა ერთ-ერთი ბილ და მელინადა გეიტსების ფონდია. საქმიანობის შეუფერხებლად გასაგრძელებლად ფონდები ამ აქციებს ყიდიან ხოლმე.

2006 წლიდან დღემდე უორენ ბაფეტმა ჯამში 27,54 მილიარდი დოლარის მოცულობის თანხა ქველმოქმედებაში დახარჯა. აქედან თითქმის 75 პროცენტი, 21 მილიარდი გეიტსების ფონდში გადარიცხა. ეს ფონდი მთელ მსოფლიოში შიმშილისა და სიღარების აღმოსაფხვრელად მუშაობს.

უორენ ბაფეტი აქტიური ქველმოქმედია, წელიწადში ერთხელ აუქციონზე ყიდის მასთან ვახშმის უფლებას და შემოსულ თანხას ქველმოქმედებაში ხარჯავს. წელს ეს უფლება 2,6 მილიონ დოლარად გაიყიდა და შემოსული თანხა კალიფორნიელ უსახლკაროების დასახმარებლად გადაირიცხა.