ჰონგ-კონგში საუკუნოვანი ისტორიის მქონე რესტორანმა ამერიკულ კომპანია Pizza Hut-თან თანამშრომლობა წამოიწყო. თანამშრომლობის მიზანი კულტურების გაერთიანებაა, შედეგი კი, არც მეტი, არც ნაკლები — გველის ხორცის პიცა.

რესტორანმა Ser Wong Fun ახალი კერძი, რომელიც გველის დაკეპილ ხორცს, ლორს და სოკოს შეიცავს, მომხმარებელს სულ ცოტა ხნის წინ წარუდგინა. 23 სანტიმეტრი დიამეტრის მქონე პიცა, ტომატის ნაცვლად, ჰალიოტისის სოუსითაა გაფორმებული.

როგორც ჰონგ-კონგში, ასევე სამხრეთ-აღმოსავლეთ აზიის ბევრ ქვეყანაში, გველის ხორცი ტრადიციული სამზარეულოს განუყოფელი ნაწილია. ზოგიერთ სახელმწიფოში, მაგალითად ვიეტნამსა და ტაილანდში, გველების ფერმებიც კია მოწყობილი. ითვლება, რომ ქვეწარმავლის ხორცისგან კერძების მოსამზადებლად საუკეთესო დრო შემოდგომაა, როცა გველები ზამთრის ძილისთვის ემზადებიან.

სამხრეთ-აღმოსავლეთ აზიაში ბევრ მცხოვრებს ასევე მიაჩნია, რომ გველის ხორცის მირთმევას სამკურნალო-გამაჯანსაღებელი დანიშნულება აქვს.

Pizza Hut-ს კი აზიის სხვა ქვეყნებშიც უცდია ტრადიციული და თანამედროვე სამზარეულოს გაერთიანება. ასე მიიღეს ღორის შედედებული სისხლით გაფორმებული პიცა ტაივანში და პიცა რამენით — იაპონიაში. კომპანიის სამომავლო გეგმები ახლა ჩინურ სამზარეულოს უკავშირდება.

რაც შეეხება გველებს, ამ რეპტილიებს შორეულ აზიაში მხოლოდ საკვებად არ იყენებენ. ცხოველთა უფლებადამცველი ორგანიზაცია PETA-ის ცნობით, ინდონეზიაში, მალაიზიასა და ვიეტნამში ყოველწლიურად, სულ მცირე, 440 ათას პითონს სასტიკი მეთოდებით ხოცავენ მათგან სამოსის თუ სხვადასხვა აქსესუარის დასამზადებლად.

ასევე იხილეთ: