De-aging კინო და სატელევიზიო ინდუსტრიაში ერთ-ერთი ყველაზე ფართოდ გავრცელებული ვიზუალური ეფექტია, რომლის გამოყენებითაც მსახიობებს ეკრანზე აახალგაზრდავებენ. რადგან ნეტფლიქსის პოპულარული სერიალის, Stranger Things-ის, მეხუთე და ბოლო სეზონი იგვიანებს, ბევრი ეჭვობდა, რომ მსახიობებს სწორედ მსგავსი ტექნიკით გააახალგაზრდავებდნენ — მით უმეტეს, რომ მთავარი გმირების შემსრულებელი მსახიობების უმეტესობა მოზარდი აღარაა და ასაკის მატება უკვე თვალსაჩინოა.

სერიალის ერთ-ერთმა აღმასრულებელმა პროდიუსერმა და რეჟისორმა შონ ლევიმ ცოტა ხნის წინ აღნიშნა, რომ ყველა ზომას მიმართავდნენ, რათა მსახიობების ასაკის მატება ეკრანზე ნაკლებად შესამჩნევი ყოფილიყო. თუმცა, ახლა აკონკრეტებს, რომ სპეცეფექტები არ უგულისხმია და საქმეში ხელოვნური ინტელექტი არ ჩაერევა.

"მიკვირს, რომ ამ თემაზე ჩემი ნათქვამი ერთი წინადადება ასე გაიშალა", — აღნიშნავს ლევი, — "მთავარია, რომ ჩვენ ვიცით, რასაც ვაკეთებთ ამ სერიალით. შესანიშნავი მსახიობები გვყავს, ძმებ დაფერებს კი ძალიან რეალისტური პერსონაჟები ჰყავთ შექმნილი".

ფოტო: Netflix

Stranger Things-ის ამ დროისთვის ბოლო, მეოთხე სეზონის გადაღებების დაწყებიდან სამ წელზე მეტია გასული. მას შემდეგ სერიალის მსახიობების ცხოვრებაშიც ბევრი რამ შეიცვალა — მაგალითად, ილევენის შემსრულებელმა მილი ბობი ბრაუნმა, რომელიც Stranger Things-ის დაწყებისას (2016) სულ რაღაც 12 წლის იყო, იქორწინა კიდეც.

უცნობია, რა ეტაპზეა სერიალის დასკვნით სეზონზე მუშაობა. გადაღებები მაისში ჰოლივუდის სცენარისტებისა და მსახიობების მასშტაბური გაფიცვის გამო გადაიდო.

შონ ლევის თქმით, შემოქმედებით გუნდს "ერთი სული აქვს", როდის დაუბრუნდებიან საქმეს.

"მაყურებელს უნდა ახსოვდეს რომ, ჩვენ, ვინც Stranger Things-ს ვქმნით, ამ სერიალის ფანები ვართ ასევე", — ამბობს პროდიუსერი.

სანამ Stranger Things-ის მე-5 სეზონი გამოვა, ფანებს შეუძლიათ სერიალის ერთ-ერთ მთავარ გმირზე, ედიზე, დაწერილი წიგნით შეიქციონ თავი. ნაწარმოები, სახელწოდებით Flight of Icarus, 31 ოქტომბერს გამოიცა.

აღსანიშნავია ისიც, რომ გაზაფხულზე ნეტფლიქსმა Stranger Things-ის ანიმაციური სერიალი დააანონსა.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…