უკრაინის პრეზიდენტის ოფისის ყოფილი მრჩეველი, ოლექსი არესტოვიჩი საპრეზიდენტო არჩევნებში მონაწილეობის მიღებას აპირებს.

  • მან ამის შესახებ "ინტერფაქს უკრაინასთან" განაცხადა.
  • მისი თქმით, თუ არჩევნები ჩატარდება, ის საკუთარ კანდიდატურას დააყენებს.
  • საპრეზიდენტო არჩევნები უკრაინაში 2024 წელს უნდა ჩატარდეს, თუმცა ამჟამად მიმდინარეობს დისკუსია, რამდენად აუცილებელია არჩევნების გამართვა საომარი მდგომარეობის პირობებში.

არესტოვიჩი პრეზიდენტის ოფისის მრჩევლის თანამდებობიდან 17 იანვარს გადადგა, თუმცა მის გადაწყვეტილებას უსიამოვნო წინაპირობა ჰქონდა.

  • 14 იანვარს მან განაცხადა, რომ რაკეტა, რომელიც დნიპროში მრავალსართულიან საცხოვრებელ კორპუსს დაეცა და 40-ზე მეტი ადამიანი იმსხვერპლა, უკრაინის საჰაერო თავდაცვის სისტემამ ჩამოაგდო და აფეთქება სწორედ ამან გამოიწვია.
  • არესტოვიჩის სიტყვები მალევე აიტაცეს რუსმა პროპაგანდისტებმა, რასაც სოციალურ ქსელებში მწვავე გამოხმაურება მოჰყვა.
  • პრეზიდენტის ოფისის ხელმძღვანელის მრჩეველი გააკრიტიკა დნიპროს მერმა, რომელმაც თქვა, რომ თავისი განცხადებით არესტოვიჩმა რუსულ პროპაგანდას საჩუქარი გაუკეთა.
  • ბრალდება უარყო უკრაინის საჰარეო ძალებმაც — მათი სპიკერის, იური იგნატის განცხადებით, უკრაინის შეიარაღებულ ძალებს საერთოდ არ გააჩნია საშუალება, ჩამოაგდონ მტრის იმ ტიპის რაკეტა (Х-22), რომელზეც არესტოვიჩი საუბრობდა.
  • 16 იანვარს ცნობილი გახდა, რომ არესტოვიჩის გადაყენების მოთხოვნით რადას დეპუტატებმა ხელმოწერების შეგროვება დაიწყეს.
  • 17 იანვარს კი არესტოვიჩმა თქვა, რომ პრინციპული შეცდომა დაუშვა, რის გამოც პრეზიდენტის მრჩევლის თანამდებობიდან გადადგომის გადაწყვეტილება მიიღო.