ნოემბერი დადგა, რაც იმას ნიშნავს, რომ საშობაო სამზადისის დროც მოვიდა. არ გჯერათ? მერაია ქერის ჰკითხეთ!

ამერიკელმა ვარსკვლავმა ტრადიციას არც წელს უღალატა და 1-ელ ნოემბერს სადღესასწაულო სეზონი გახსნა. მუსიკოსმა 2021 წელს ჰელოუინის გოგრები ბეისბოლის ჯოხით დაამტვრია, შარშან — ჯადოქრიდან სანტად გადაიქცა, წელს კი გადაწყვიტა, ცნობილი მიმი გაეცოცხლებინა.

სოციალური ქსელის მომხმარებლები ხშირად ხუმრობენ, ზაფხულის დამთავრებისთანავე გაყინული მერაია ქერი "გალღობას" იწყებსო. საქმე ისაა, რომ მომღერლის უდავოდ ყველაზე ცნობილი სიმღერა All I Want for Christmas Is You უკვე სამი ათწლეულია, შობა-ახალწლის შეუცვლელ ატრიბუტს წარმოადგენს. ყველაფერი კი ყოველი წლის ნოემბერში იწყება, როცა კომპოზიცია მსოფლიო ჩარტებში მაღლა-მაღლა სვლას იწყებს.

ჰოდა, რა გასაკვირია, რომ 1-ელი ნოემბერი სადღესასწაულო სეზონის გახსნის ოფიციალური თარიღია. მერაიამაც არ დააყოვნა და სულ ახლახან ვიდეო შემოგვთავაზა, როგორ იწყებს "გალღობას" თავისი სიმღერის ფონზე ნოემბრის დადგომისთანავე.

"დროა!!!", — გვატყობინებს შობა-ახალწლის უგვირგვინო დედოფალი თავისი განთქმული ხმით ვიდეოში.

All I Want for Christmas Is You ("ერთადერთი რამ, რაც საშობაოდ მინდა, შენ ხარ") მერაია ქერიმ 1994 წელს გამოუშვა თავის საშობაო ალბომთან ერთად. მას შემდეგ სიმღერის პოპულარობა ისე გაიზარდა, რომ პირველი საშობაო ტრეკი გახდა, რომელსაც ამერიკის ხმისჩამწერი კომპანიების ასოციაციამ (RIAA) ბრილიანტის სტატუსი მიანიჭა. 2021 წელს ქერიმ რეკორდი მოხსნა და თავისი სიმღერით ზედიზედ მესამედ მოექცა ბილბორდის ასეულის სათავეში.

მხოლოდ ამ სიმღერამ ქერის $60 მილიონზე მეტი მოუტანა. თუმცა, როგორც მომღერალი ამბობს, თავად სულაც არ მოელოდა ასეთ წარმატებას მაშინ, როცა კომპოზიცია მსოფლიოში პირველად მოისმინეს.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...