რა ხდება? შვიდ უკრაინელ კაცს, რომლებმაც რუსულ კოლონიაში სასჯელი მოიხადეს და ახლა, საქართველოს გავლით, სამშობლოში დაბრუნებას ცდილობს, საქართველოს ტერიტორიაზე არ უშვებენ, — იტყობინება დამოუკიდებელი რუსული ინტერნეტგამოცემა მედუზა ორგანიზაცია თბილისის მოხალისეებზე [*Volunteers Tbilisi] დაყრდნობით — ისინი ეხმარებიან უკრაინელ ლტოლვილებს საქართველოში.

დეტალები: მედუზა, თბილისის მოხალისეებზე დაყრდნობით წერს, რომ

  • ყოფილი ხერსონელი პატიმრები უკვე 14 დღეა ზემო ლარსის გამშვებ პუნქტზე იმყოფებიან.
  • მესაზღვრეები მათ საქართველოს ტერიტორიაზე არ უშვებენ, რადგან "ელოდებიან პასუხს უკრაინის საგარეო საქმეთა სამინისტროსგან".
  • უკრაინის პასპორტი მხოლოდ ოთხ მათგანს აქვს, სამმა კი, მხოლოდ რუსეთის კოლონიიდან გათავისუფლების საბუთი წარმოადგინა.
  • "ჩვენ უკრაინის მოქალაქეები ვართ და უბრალოდ, გვინდა, უკრაინაში დავბრუნდეთ", — თქვა ერთ-ერთმა მათგანმა.

რა ვიცით მათზე?

  • პატიმრობის ვადა, შვიდივემ, ხერსონის კოლონიებში მოიხადა.
  • როგორც ერთ-ერთი მათგანი ამბობს, ვიდრე 2022 წელს, უკრაინის შეიარაღებული ძალები ქალაქს გაათავისუფლებდნენ, ისინი სხვა კოლონიებში გადაიყვანეს "რუსეთის მიმართულებით".
  • გათავისუფლების შემდეგ, კაცები ვოლგოგრადის სადეპორტაციო ცენტრში მოხვდნენ, სადაც უთხრეს, რომ მათ რუსეთში 8 წლის განმავლობაში ეკრძალებათ შესვლა.

რა პირობებში არიან ისინი ახლა?

  • 2023 წლის 11 ოქტომბრიდან, ყოფილი პატიმრები საქართველო-რუსეთის საზღვარზე იმყოფებიან.
  • მათი თქმით, ცხოვრობენ ბუფერულ ზონაში მდებარე შენობის დერეფანში.
  • იატაკზე სძინავთ.
  • ერთ-ერთმა მათგანმა თქვა, რომ პროტესტის ნიშნად, ვენები გადაიჭრა. მას სამედიცინო დახმარება გაუწიეს, ამჟამად, მისი მდგომარეობა სტაბილურია.

  • უკრაინელ მამაკაცებს პროდუქტითა და წყლით მოხალისეები ამარაგებენ.

    რას აპირებენ? მათ, მოხალისეების დახმარებით, საქართველოში უკრაინის საელჩოს, გაეროს და ადამიანის უფლებათა ევროპულ სასამართლოს მიმართეს, თუმცა მათი პრობლემის გადაჭრა, ჯერჯერობით, ვერცერთმა მხარემ შეძლო.