ჰამბურგში დიდი ოცეულის სამიტთან დაკავშირებული საპროტესტო აქცია განახლდა. დემონსტრანტები აგრძელებენ ქუჩების გადაკეტვასა და მანქანების დაწვას. ჰამბურგის პოლიცია აქციის დასაშლელად წყლის ჭავლსა და ცრემლსადენ გაზს იყენებს.

"ამ დროისთვის მიმდინარეობს ოპერაცია აგრესიული აქტივისტების წინააღმდეგ" – განაცხადა ჰამბურგის პოლიციამ AFP-სთან საუბრისას.

7 ივლისს ჰამბურგში G20-ის სამიტი იმართება. დღესვე იგეგმება ამერიკისა და რუსეთის პრეზიდენტების პირველი შეხვედრა.

სამიტის უსაფრთხოდ ჩატარებას პოლიციის და სპეცსამსახურის 20 ათასი თანამშრომელი უზრუნველყოფს.

ფოტო: GETTY IMAGES / BBC

საპროტესტო აქციები ჰამბურგში 6 ივლისს დაიწყო, რაც მალევე გადაიზარდა დაპირისპირებაში.

პოლიციამ ექსტრემისტების შეჩერება სცადა, თუმცა მათ სამართალდამცავებს დაუშინეს ცეცხლწაკიდებული ბოთლები. პოლიციამ წყლის ჭავლი და წიწაკის გაზი გამოიყენა. შეტაკების შემდეგ, ძალიან მალე, აქციის ორგანიზატორებმა გამოაცხადეს, რომ საპროტესტო აქცია დასრულებულია.

მოგვიანებით, საპროტესტო აქცია კვლავ განახლდა. აქტივისტებმა ქუჩაში ავტომობილებისა და საბურავების დაწვა დაიწყეს. მთავრობის ოფიციალურმა წარმომადგენელმა ტვიტერზე ანგელა მერკელის ციტირება გამოაქვეყნა:

"არანაირი გამართლება არ აქვს ძალადობრივ საპროტესტო აქციას. დარწმუნებული ვარ, რომ პოლიცია ყველაფერს გააკეთებს ძალადობის აღმოფხვრისათვის. მშვიდობიანი მომიტინგეების მიმართ პატივისცემას გამოვხატავ. ისინი კი ვინც აგრესიას გამოხატავენ, დასცინიან დემოკრატიას".