მოკლედ: შეხვედრა ათონელის რეზიდენციაში შედგა. პრეზიდენტი სალომე ზურაბიშვილი შეხვდა ანა ნაცვლიშვილს (ლელო), ანა წითლიძეს (ენმ), ხატია დეკანოიძეს — პარლამენტის დამოუკიდებელ დეპუტატს და ხათუნა სამნიძეს (რეფორმების ჯგუფი).

რაზე ისაუბრეს? საქართველოსთვის ევროკავშირის კანდიდატი ქვეყნის სტატუსის მინიჭებასთან დაკავშირებულ გამოწვევებზე, 12-პუნქტიანი გეგმის შესრულებასა და დაბრკოლებებზე, რომელსაც პროცესში ქართული ოცნება ქმნის.

  • დეპუტატებმა თქვეს, რომ შეხვედრაზე არ უსაუბრიათ სალომე ზურაბიშვილის პოლიტიკურ, საარჩევნო გეგმებზე.

ციტატები:

  • "პრეზიდენტი არ აპირებს, დაემორჩილოს რუსეთს და მათი მოკავშირე ხელისუფლების მცდელობებს, ჩავარდეს ქვეყნის ევროპული მომავლის პერსპექტივა" — სალომე სამადაშვილი.
  • "ვისაუბრეთ, რა უნდა გავაკეთოთ ამ მოკლე, დარჩენილ რამდენიმე დღეში, რომ დამატებითი ლეგიტიმაცია მივცეთ საერთაშორისო პარტნიორებთან ამ საკითხს. ეს იყო მთავარი თემა" — ანა წითლიძე.
  • "ზურაბიშვილი ამბობს, რომ ქართული ოცნების ნებისმიერი მუქარა არის ზემოქმედების მოხდენა სახელმწიფო ინსტიტუტზე, საქართველოს პრეზიდენტზე, რასაც პრეზიდენტი არ დაემორჩილება, არ ეშინია" — ხატია დეკანოიძე.

პრეზიდენტ ზურაბიშვილის ადმინისტრაციას, ამ შეხვედრასთან დაკავშირებით ინფორმაცია ჯერ არ გაუვრცელებია.