ლიდერის ვინაობა, რომელიც ისრაელზე ჰამასის მიერ განხორციელებული თავდასხმების უკან დგას, იმდენად გასაიდუმლოებულია, რომ მისი მხოლოდ რამდენიმე ფოტო არსებობს, მათ შორის — შავი სილუეტი, რომელსაც, პერიოდულად, პალესტინაში მისი მხარდამჭერები დემონსტრაციების დროს, ტრანსპარანტებზე იყენებენ.

მოჰამედ დეიფი

მოჰამედ დეიფი

რა ვიცით მასზე

აშშ-ის სახელმწიფო დეპარტამენტის ინფორმაციით,

  • მოჰამედ დეიფი, ღაზის სექტორში, ჰამასის სამხედრო ფრთის ლიდერია.
  • 2015 წელს, აშშ-ის ხელისუფლებამ დეიფი საერთაშორისო ტერორისტად გამოაცხადა და თვითმკვლელი ტერორისტების მიერ განხორციელებულ ტერაქტებსა და ისრაელელი სამხედროების გატაცებაზე პასუხისმგებელ პირად ცნო.
  • სახელმწიფო დეპარტამენტის განცხადებით, 2014 წელს, ღაზაში ომის დროს, დეიფი ჰამასის თავდასხმის სტრატეგიას უძღვებოდა.

"სტუმარი" ტერაქტებს მიღმა

მიუხედავად იმისა, რომ დეიფის როლი უმნიშვნელოვანესია ჰამასის ყველაზე ცნობილი თავდასხმების დაგეგმვასა და განხორციელებაში, ის ყველასთვის მიუწვდომელ და მოუხელთებელ ადამიანად რჩება.

ყოველთვის უცნობია მისი კონკრეტული ადგილსამყოფელი, სავარაუდოდ, ამიტომ შეარჩია სახელად "დეიფი", რაც "სტუმარს" ნიშნავს.

გზავნილები ისრაელის წინააღმდეგ

  • შაბათს, 7 ოქტომბერს, თავდასხმის დაწყების დღეს, ჰამასის სატელევიზიო არხმა მუჰამედ დეიფის მიმართვა გაავრცელა. მიმართვა წინასწარ იყო ჩაწერილი.

დეიფი ამბობდა, რომ თავდასხმები იყო პალესტინის წინააღმდეგ ისრაელის მიერ განხორციელებულ მოქმედებაზე პასუხი, ჰამასის ოპერაციას კი "ალ-აქსას წარღვნას", ან "ოპერაცია ალ-აქსას ქარიშხალს" უწოდებდა.

  • ფრაზა უკავშირდება იერუსალიმში მდებარე ალ-აქსას მეჩეთს, რომელიც მუსლიმებისთვის მესამე ყველაზე მნიშვნელოვანი და წმინდა ადგილია.
  • აპრილში ისრაელის პოლიციამ მეჩეთში სპეცოპერაცია ჩაატარა, რის შედეგადაც ათობით მორწმუნე დაშავდა.

ღირსეულო მებრძოლებო, დადგა დღე, რომ დამარხოთ ეს დამნაშავე მტერი. მისი დრო დასრულებულია. მოკალით, სადაც კი ნახავთ მათ. მოაშორეთ ეს სიბინძურე თქვენი მიწიდან და წმინდა ადგილებიდან. იბრძოლეთ და ანგელოზები იბრძოლებენ თქვენთან ერთად,

განაცხადა მიმართვაში დეიფმა.

  • გავრცელებული ცნობებით, დეიფთან ერთად, თავდასხმების მზადებაში მონაწილეობდა ჰამასის კიდევ ერთი ლიდერი, იაჰია სინვარი, თუმცა სწორედ დეიფი იყო პირი, ვინც სტრატეგია და დეტალები შეიმუშავა.

პასუხი ისრაელისგან

  • ისრაელმა, პასუხად, ოფიციალურად გამოუცხადა ომი ჰამასს და მას შემდეგ შეუჩერებლად ბომბავს ღაზის სექტორს.
  • გაეროს წარმომადგენლებმა გამოთქვეს შეშფოთება, რომ კონფლიქტი ჰუმანიტარულ კატასტროფამდე მიიყვანს ღაზას.
  • ისრაელის თავდაცვის მინისტრმა, იოავ გალანტმა გასული კვირის დასაწყისში განაცხადა, რომ ღაზის სექტორში საკვები და საწვავი აღარ შევა. 2.3 მილიონზე მეტი ადამიანი ღაზის სექტორში რჩება, რადგან ერთადერთი გასასვლელი ეგვიპტის ტერიტორიაზე მათთვის დაკეტილია.
  • ისრაელის შეიარაღებულმა ძალებმა განაცხადა, რომ 350 ათასზე მეტი რეზერვისტი უკვე მზად არის სახმელეთო შეტევისთვის ღაზაში, რაც მსხვერპლს კიდევ უფრო გაზრდის.