აშშ ს დამოუკიდებლობის დღის უქმეებზე, ადგილობრივ ბანდებს შორის შეიარაღებული დაპირისპირების შედეგად, გარდაცვლილია 15, ხოლო დაჭრილია 100-მდე ადამიანი.

დაღუპულებს შორისაა 13 წლის მოზარდიც ხოლო, დაშავებულთა მდგომარეობა სხვადასხვა სიმძიმისაა. დაპირისპირება ჩიკაგოს ჩრდილოეთ და დასავლეთ უბნებში მოქმედი კრიმინალურ დაჯგუფებებს შორის მოხდა. აღსანიშნავია, რომ, უქმე დღეებზე კრიმინალის მაღალი რისკის გამო ქალაქის ხელისუფლებამ დამატებით ათასი პოლიციელი გაგზავნა საშიშ უბნებში, თუმცა მათ ვერ შეძლეს სიტუაციის გაკონტროლება. ჩიკაგოში შექმნილ ვითარებას ასევე გამოეხმაურა დონალდ ტრამპიც. მან თქვა, რომ ჩიკაგოში ადგილობრივი პოლიციის დასახმარებლად ფედერალური ბიუროს აგენტებს გააგზავნის.

ჩიკაგოში დამოუკიდებლობის დღის უქმეებზე მსგავსი სიტუაცია დაფიქსირდა 2016 წელსაც თუმცა, მაშინ დაშავებულთა რიცხვი საგრძნობლად ნაკლები იყო, წინა წლის არეულობისას ჯამურად, 66 ადამიანი დაშავდა.

კრიმინოგენული ვითარება ჩიკაგოში ბოლო წლების განმავლობაში უარესდება თუმცა, ქალაქის მთავრობის განცხადებით, ისინი ახერხებენ ეფექტიანად ებრძოლონ ადგილობრივ კრიმინალურ დაჯგუფებებს. წელს ჩიკაგოში ცეცხლსასროლი იარაღის გამოყენების შემთხვევები, წინა წელთან შედარებით, 14 პროცენტით ნაკლებია.