2023 წლის საბავშვო ევროვიზია მოახლოვდა. მასშტაბურ მუსიკალურ ფესტივალზე საქართველოს წელს ანასტასია ვასაძე, ნიკოლოზ ხარატი და ოთო ბაზერაშვილი წარადგენენ. საკონკურსო სიმღერის პრემიერა სულ ცოტა ხნის წინ შედგა. Over The Sky — ასე ჰქვია კომპოზიციას, რომელზეც მებო ნუცუბიძემ და ბეთხომ (ირაკლი მანჩხაშვილი) იმუშავეს.

სიმღერაზე ვიდეოკლიპი რეჟისორმა ზაზა ორაშვილმა გადაიღო. მხატვარი შაკო პოპიაშვილია, კოსტიუმების დიზაინერი კი იზა ნადარეიშვილი გახლავთ.

საბავშვო ევროვიზიის წლევანდელ კონკურსს საფრანგეთის ქალაქი ნიცა უმასპინძლებს. თავდაპირველად, კონკურსზე საქართველოს წარმომადგენლად მხოლოდ ანასტასია ვასაძე იყო შერჩეული, რომელმაც ეს სტატუსი პირველი არხის პროექტ რანინაში გამარჯვებით მოიპოვა. თუმცა, მოგვიანებით 11 წლის მომღერალს რანინას კიდევ ორი მონაწილე შეუერთდა.

აი, საფრანგეთმა კი ევროვიზია ჯუნიორის მასპინძლობის უფლება გასულ წელს, ერევანში გამართულ კონკურსზე გამარჯვების შემდეგ მოიპოვა. ნიცაში წლევანდელი ღონისძიებისთვის მზადება კი უკვე დასკვნით ეტაპს უახლოვდება. საბავშვო ევროვიზია 2023-ზე მონაწილეობას 16 ქვეყანა მიიღებს, მათ შორის, დებიუტანტი ესტონეთი. კონკურსის ფინალური შოუ 26 ნოემბერს გაიმართება და მის პირდაპირ ტრანსლაციას პირველი არხი უზრუნველყოფს.

საქართველო საბავშვო ევროვიზიაზე

ევროვიზია ჯუნიორზე საქართველო ამ დრომდე რჩება ყველაზე წარმატებულ მონაწილე ქვეყნად. ჩვენს ანგარიშზე რეკორდული სამი გამარჯვება ირიცხება. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამას გარდა, საქართველომ ევროვიზია ჯუნიორზე ორჯერ დაიკავა მეორე ადგილი და ხუთჯერ მოხვდა საუკეთესო ხუთეულში. გასულ წელს ერევანში მე-3 ადგილი დაიკავა მარიამ ბიგვავამ.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...