ქართულ სატელევიზიო მეგაშოუებს თუ აქტიურად ადევნებთ თვალს, უთუოდ გემახსოვრებათ ნინი ბრეგვაძე, რომელიც 2015 წელს X ფაქტორის მე-2 სეზონის ფინალისტი გახდა. ამ ამბიდან რვა წლის შემდეგ ქართველი მომღერალი უკვე ამერიკულ The Voice-ში წარდგა და სიმღერის დაწყებიდან სულ რამდენიმე წამში ოთხივე მწვრთნელი ერთიმეორის მიყოლებით შემოატრიალა.

სასცენო სახელით Nini Iris, ახალგაზრდა მუსიკოსმა "ბრმა ქასთინგზე" ჯგუფ Everybody Loves an Outlaw-ის ცნობილი სიმღერა I See Red შეასრულა.

"რომელი პლანეტიდან ხარ?", — ამ შეკითხვით მიმართა ნინის სიმღერის დასრულების შემდეგ ირლანდიელმა პოპვარსკვლავმა და ერთ-ერთმა მწვრთნელმა, ნაილ ჰორანმა, როცა ოთხივე მწვრთნელი ტაშის დასაკრავად ფეხზე წამოდგა.

ჰორანმა ასევე აღნიშნა, რომ ნინის შესრულება ვოკალური თვალსაზრისით საუკეთესო იყო ქასთინგის დღეს.

"ვფიქრობ, სცენაზე ახლა პოტენციურ გამარჯვებულს ვხედავთ", — დაამატა ნაილმა.

ქართველი მომღერლისთვის საქებარი სიტყვები არც სხვა მწვრთნელებს დაუშურებიათ.

"ახლა დიდი მისია გაკისრია, რადგან გრემის პერფორმანსი გვიჩვენე უკვე", — აღნიშნა გვენ სტეფანიმ, — "თავდაჯერებულობა შენში ძალიან ბუნებრივადაა".

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა.

"რთული გზა გამოვიარე", — ამბობს ნინი და იმ დროს იხსენებს, როცა ღამის გათევა მეტროში უხდებოდა ხოლმე, — "ცხოვრების თავიდან დაწყება მომიწია. უნდა მეპოვა საცხოვრებელი და სამსახური, იმ მიზნისთვის სწრაფვა უნდა დამეწყო, რომლის მისაღწევადაც აქ ჩამოვედი".

ამჟამად ამერიკული ვოისის 24-ე სეზონი მიმდინარეობს. ნინიმ მწვრთნელად ნაილ ჰორანი აირჩია და სწორედ მის გუნდში გააგრძელებს მოგებისთვის ბრძოლას. აღსანიშნავია, რომ პროექტის წინა სეზონის გამარჯვებული ჯინა მაილსიც ჰორანის გუნდში იყო, თავად ნაილმა კი პოპვარსკვლავობამდე გზა ასევე მეგაპროექტში, ბრიტანულ X ფაქტორში, მონაწილეობით გაიკვალა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...