ეროვნული ბანკის ინიციატივით, ფინანსური განათლების ცნობიერების ამაღლების ხელშესაწყობად, წელს პირველად, ფინედუ და საქართველოს საფინანსო სექტორი 6-7 ოქტომბერს განათლების საერთაშორისო გამოფენას შეუერთდებიან. ღონისძიება ექსპო ჯორჯიას მე-11 პავილიონში (წერეთლის 118) გაიმართება.

ფოტო: საქართველოს ეროვნული ბანკი

სტუმრებს ფინანსური ცოდნის გამოცდის და პრიზების მოგების შესაძლებლობა ყოველ საათში ერთხელ ფინედუს კუთხესთან ექნებათ. განრიგი კი ასეთი გახლავთ:

ფოტო: საქართველოს ეროვნული ბანკი

ასევე, ფინანსური განათლების სივრცეში 11 საათიდან 19 საათამდე სტუმრებს მრავალფეროვან აქტივობებსა და სიურპრიზებს შესთავაზებენ საფინანსო ორგანიზაციების წარმომადგენლები.

გამოფენაში საფინანსო სექტორის მონაწილეობის მიზანი ფინანსური განათლების შესახებ ცნობიერების ამაღლებაა. მოსახლეობის ფინანსური განათლება საქართველოს ეროვნული ბანკის ერთ-ერთი პრიორიტეტია, რაც ასახულია კიდეც ფინანსური განათლების ეროვნულ სტრატეგიაში. ამ მიმართულებით ქვეყნის მთავარი ბანკი დაინტერესებულ მხარეებთან პარტნიორობით ბოლო წლების განმავლობაში არაერთ პროექტსა თუ ღონისძიებას ახორციელებს.

თბილისში განათლების ყველაზე მასშტაბური და მრავალფეროვანი გამოფენა ექსპოჯორჯიას ორგანიზებით იმართება. ღონისძიებაში ეროვნული ბანკთან ერთად ჩაერთვება მის მიერ დაარსებული ფინანსური განათლების პლატფორმა ფინედუ, საბანკო ასოციაცია და ხუთი კომერციული ბანკი: საქართველოს ბანკი, თიბისი ბანკი, ლიბერთი ბანკი, კრედო ბანკი და პაშა ბანკი/რებანკი.

გამოფენის დამთვალიერებელს შესაძლებლობა ექნება, დაესწროს საინტერესო ლექციებს და მონაწილეობა მიიღოს სხვადასხვა შემეცნებით და ინტერაქციულ აქტივობაში.