შტადლერის ორსართულიანი მატარებლების მგზავრები თბილისიდან ბათუმამდე (და პირიქით) გზაში წახემსებას შეძლებენ. პირველი ივლისიდან მატარებლების ორ ვაგონში სპეციალური დახლები განთავსდა.

როგორც საქართველოს რკინიგზის პრესსამსახურის წარმომადგენელმა, დაჩი ცაგურიამ, On.ge-ს უთხრა, მგზავრებს ინტერესთა გამოხატვაში გამარჯვებული Breadbar მოემსახურება.

მატარებლებში კვების სერვისი 15 ოქტომბრამდე გაგრძელდება. როგორც Breadbar-ში გვითხრეს, მატარებელში შეტანილი პროდუქტების ღირებულება 1 ლარიდან 5 ლარამდე იქნება და მათ შორის არ იქნება ცხელი ყავა და ჩაი:

"გვაქვს კრუასანები, ღვეზელები, სენდვიჩები, მაკარონი (ფრანგული ნამცხვარი), ცივი ჩაი, ქადები, მაფინები. გამაგრილებელი სასმელი ცივი ჩაია, ნახევარლიტრიანი 3 ლარი ღირს. გვაქვს კრუასანი შოკოლადით და ნუშით, რაც 3 ლარი ღირს. სენდვიჩი გვაქვს ორი სახის –ტოსტის პურში ლორითა და ყველით და ასევე, ბაგეტის პურში ლორით და ყველით. ის 5 ლარი ღირს. მაკარონის ფასი 1 ლარია".

შეგახსენებთ, რომ სეზონზე თბილისი-ბათუმის მიმართულებით მატარებლების ღირებულება გაძვირდა. საქართველოს რკინიგზაში კი ამბობენ, რომ ღირებულება კი არ გაძვირდა, არამედ მასზე ის ფასდაკლება მოიხსნა, რომელიც არა სეზონის განმავლობაში მოქმედებდა. სეზონური ფასები ივლისის დასაწყისიდან 15 სექტემბრამდე იმოქმედებს. გაიგეთ მეტი.