კალიფორნიის გუბერნატორმა, გევინ ნიუსონმა, ახლახან მოაწერა ხელი კანონს, რომელიც შტატის ყველა სკოლას 2026 წლამდე გენდერულად ნეიტრალური საპირფარეშოების დამატებას ავალდებულებს. გუბერნატორის მიერ მიღებული კანონი იმ კანონთა შორისაა, რომლებიც კალიფორნიაში LGBTQ საზოგადოების უფლებების დაცვას ემსახურება.

"კალიფორნია ამაყობს იმით, რომ როდესაც საქმე LGBTQ საზოგადოების დაცვასა და მხარდაჭერას ეხება, მთელს ქვეყანაში ყველაზე მტკიცე კანონები გვაქვს", — ნათქვამია გუბერნატორის განცხადებაში.

ახალი კანონის მიხედვით, კალიფორნიის თითოეულ სკოლას მოეთხოვება შენობაში მინიმუმ ერთი გენდერულად ნეიტრალური საპირფარეშო ჰქონდეს 2026 წლის პირველ ივლისამდე. საპირფარეშო ხელმისაწვდომი უნდა იყოს როგორც საგაკვეთილო პროცესის პერიოდში, ასევე ნებისმიერ დროს, როცა მოსწავლეები სკოლაში იმყოფებიან. კანონი ასევე მოითხოვს, რომ გენდერულად ნეიტრალურ საპირფარეშოს ისეთი ნიშანი ჰქონდეს, რომელიც მიუთითებს, რომ ეს სივრცე ნებისმიერი გენდერის ადამიანისთვის ხელმისაწვდომია.

საპირფარეშოზე ხელმისაწვდომობის საკითხი ბოლო წლებია, აშშ-ში დებატების თემაა. 2016 წელს ჩრდილოეთ კაროლინაში მიიღეს კანონი, რომელიც ადამიანებს ავალდებულებდა იმ საპირფარეშოთი ესარგებლათ, რომელიც მათ დაბადების მოწმობაში მითითებულ სქესს შეესაბამებოდა. ამ კანონმა ადამიანების უფლებების დამცველთა მხრიდან დიდი კრიტიკა გამოიწვია, მოგვიანებით კი გაუქმდა.

რაც შეეხება სხვა შტატებს, წლის დასაწყისში აიდაჰოში მიიღეს კანონი, რომელიც ტრანსგენდერ მოსწავლეებს იმ საპირფარეშოთი სარგებლობას აიძულებდა, რომელიც მათთვის დაბადებისას მინიჭებულ სქესს შეესაბამება. გასულ თვეში კი აიდაჰოს ფედერალურმა სასამართლომ შემაკავებელი ორდერი გამოცდა, რომელიც ამ კანონის აღსრულებას კრძალავს.