ესპანეთის ფეხბურთის ფედერაციის პრეზიდენტმა, ლუის რუბიალესმა, თანამდებობა დატოვა. მის გარშემო სკანდალი მას შემდეგ ატყდა, რაც ერთი თვის წინ, რუბიალესმა ქალების მსოფლიო ჩემპიონატის ფინალში ესპანეთის ქალთა ნაკრების გამარჯვების შემდეგ, ფეხბურთელ ჯენიფერ ერმოსოს ტუჩებში აკოცა, რაც კამერებმა დააფიქსირეს.

ამას საზოგადოებისგან კრიტიკის ტალღა მოჰყვა. ერმოსომ იმავე დღეს განაცხადა, რომ პრეზიდენტმა ნების საწინააღმდეგოდ აკოცა, რაც მისთვის მოულოდნელი და მიუღებელი იყო. რუბიალესმა თავდაპირველად კრიტიკოსებს "სულელები და იდიოტები" უწოდა, თუმცა მოგვიანებით განაცხადა, რომ შეცდომა დაუშვა.

მალე მედიაში ინფორმაცია გავრცელდა, რომ რუბიალესი ინციდენტის გამო თანამდებობის დატოვებას აპირებდა, თუმცა ასე არ მოხდა, პირიქით — გავრცელებულ მიმართვაში მან რამდენჯერმე გაიმეორა, რომ არ გადადგებოდა. ესპანეთის ფეხბურთის ფედერაცია ერმოსოს კოცნის შესახებ ტყუილში ადანაშაულებდა და სასამართლოში ჩივილითაც კი ემუქრებოდა.

აღსანიშნავია, რომ 26 აგვისტოს ფიფამ რუბიალესს ფეხბურთთან დაკავშირებული უფლებამოსილებები შეუჩერა მანამ, სანამ მისი ქმედებების შესახებ საბოლოო გადაწყვეტილებას მიიღებდა. ამის პასუხად ლუის რუბიალესის დედა ეკლესიაში ჩაიკეტა და შიმშილობა დაიწყო. ერმოსომ კი რუბიალესს სექსუალური შევიწროებისთვის უჩივლა.

სოციალურ ქსელში გავრცელებულ მიმართვაში რუბიალესი ამბობს, რომ ფიფას გადაწყვეტილების და სასამართლოს დაწყების შემდეგ ნათელია, რომ ესპანეთის ფედერაციის პრეზიდენტის პოსტზე ყოფნას ვერ გააგრძელებს. მისი თქმით, იმავე თანამდებობაზე დარჩენა არც ფედერაციას და არც ესპანეთის ფეხბურთის ინდუსტრიას კარგს არაფერს მოუტანს. თუმცა, რუბიალესის თქმით, ტყუილისა და ცილისწამების მსხვერპლია და ყველაფერს იზამს თავისი სიმართლის დასამტკიცებლად.