ქორწინების ოქროს იუბილეს — 50 წლისთავს — ყველა წყვილი განსაკუთრებულად აღნიშნავს. ამ დღეს ისინი ერთმანეთს ყვავილებსაც აჩუქებენ ხოლმე. თუმცა, ამერიკელმა ფერმერმა ლი უილსონმა გადაწყვიტა, უბრალო თაიგულს არ დასჯერებოდა. უილსონმა, რომელიც კანზასის შტატში ცხოვრობს, ცოლს ქორწინების 50 წლისთავის აღსანიშნად 32 ჰექტარზე გაშენებული 1,2 მილიონი მზესუმზირა აჩუქა.

"ამაზე ბევრი ვიფიქრე", — ჰყვება ფერმერი, — "მზესუმზირები მას ყოველთვის უყვარდა, ასე რომ, გადავწყვიტე, ეს ყვავილი 32 ჰექტარზე გამეშენებინა".

თავისი განზრახვის სისრულეში მოსაყვანად უილსონმა დახმარება შვილს სთხოვა და გაზაფხულზე მასთან ერთად დათესა მზესუმზირები, რომელიც, სხვათა შორის, კანზასის შტატის სიმბოლოცაა.

ფოტო: KAKE

შედეგი კი ზუსტად ისეთი აღმოჩნდა, როგორსაც ლი მოელოდა. მისი ცოლი, რენე, საჩუქრით აღფრთოვანებული დარჩა.

"თავი განსაკუთრებულად მაგრძნობინა", — ამბობს იგი, — "მზესუმზირების მინდორზე უკეთეს საიუბილეო საჩუქარს ვერც ვინატრებდი".

ფოტო: KAKE

წყვილის ურთიერთობა ჯერ კიდევ სკოლაში დაწყებულა. ლის რენესთვის მე-16 დაბადების დღეზე დაურეკავს და პაემანზე დაუპატიჟებია — გორგოლაჭებიანი ციგურებით სასეირნოდ. როგორც უილსონი ამბობს, სწორედ მაშინ მიხვდა, რომ რენე "ის ერთი" იყო.

მობიბინე მზესუმზირების ზღვის სანახავად კი უილსონების მშობლიურ ქალაქ პრეტს უამრავი ადამიანი სტუმრობს. ამბავს დიდი გამოხმაურება მოჰყვა ინტერნეტსივრცეშიც, სადაც ხუმრობდნენ კიდეც, რომ უილსონმა ქორწინების საიუბილეო საჩუქრის თამასა მეტისმეტად მაღლა ასწია.

"აი, მე კი მესიჯზე პასუხსაც არ მიბრუნებენ", — დასძინა ხუმრობით კიდევ ერთმა მომხმარებელმა.