ამერიკელი მსახიობი ტიმოთი შალამე და ბიზნესვუმენი კაილი ჯენერი საჯაროდ პირველად გამოჩნდნენ ერთად. წყვილის ურთიერთობის შესახებ ხმები თვეების განმავლობაში ვრცელდებოდა, სულ ახლახან კი ამ ამბის დამადასტურებელი ფოტო და ვიდეომასალა გამოცემა TMZ-მა გაავრცელა. შალამე და ჯენერი ერთად დაესწრნენ ბიონსეს კონცერტს ლოს-ანჯელესში. სტადიონის VIP სექციაში წყვილთან ერთად ასევე იყვნენ კაილის და, კენდალი, ჯასტინ და ჰეილი ბიბერები. კონცერტს ესწრებოდნენ ადელი, ზენდეია და კიმ კარდაშიანიც.

კამერებმა კი შალამესა და ჯენერის საუბარი, ჩახუტება და კოცნაც დააფიქსირეს.

ფოტო: TMZ

მედიისა და ფანების განსაკუთრებული ინტერესის მიუხედავად, 27 წლის შალამე თავის პირად ცხოვრებაზე საჯაროდ საუბარს ერიდება. მისგან განსხვავებით, კაილი ჯენერზე, რომელმაც საყოველთაო ცნობადობა კარდაშიანების რეალითი შოუში მონაწილეობით მოიპოვა, საზოგადოებისთვის ბევრი რამ არის ცნობილი. მას რამდენიმე წლის განმავლობაში ჰქონდა ურთიერთობა რეპერ ტრევის სკოტთან, რომელთანაც ორი შვილიც ჰყავს. ჯენერისა და სკოტის დაშორების ამბავი წლის დასაწყისში გახმაურდა, რამდენიმე თვეში კი ტაბლოიდები უკვე აქტიურად წერდნენ ტელევარსკვლავისა და შალამეს ურთიერთობაზე.