რა მოხდა: გუშინ ღამით შოვში, სტიქიის ზონაში ქვათაცვენა იყო, რის გამოც სამაშველო სამუშაოები დროებით შეწყდა.

  • სახელმწიფო რწმუნებულმა რაჭა-ლეჩხუმისა და ქვემო სვანეთის რეგიონში, პარმენ მარგველიძემ განაცხადა, რომ ასეთი მასშტაბის სტიქიების შემდეგ მსგავსი მოვლენები დამახასიათებელია.
  • მისივე თქმით, ღამით ცუდი ხილვადობა იყო, რის გამოც სამუშაოები დილამდე შეჩერდა.
  • "გარემოს ეროვნული სააგენტოს სპეციალისტების მიერ ვერტმფრენითა და დრონებით დათვალიერებული იქნა ეს ხეობა და მნიშვნელოვან ქვათაცვენის ფაქტს ადგილი არ ჰქონია", — თქვა მან.

გარემოს ეროვნულ სააგენტოში ამბობენ, რომ მდინარე ბუბას კალაპოტში, სადაც გუშინ, გვიან ღამით, ქვათაცვენის ფაქტი დაფიქსირდა, ვითარებას სპეციალისტები გაეცნენ.

  • მათივე თქმით, ამ ეტაპზე, მსგავსი პროცესები საფრთხის შემცველი არ არის.
  • შოვში მეწყერი 3 აგვისტოს ჩამოწვა. ბოლო მონაცემებით, სტიქიას 24 ადამიანის სიცოცხლე ემსხვერპლა.
  • ამ დრომდე ეძებენ 9 ადამიანს. სამძებრო სამუშოებში ჩართული არიან პოლიციის დანაყოფები, მეხანძრე-მაშველები, კინოლოგთა ჯგუფი, დრონები და სპეცტექნიკა.