რატომ არის მნიშვნელოვანი: ექსპრეზიდენტი ხელისუფლების წარმომადგენლების მიერ 2008 წლის ომთან დაკავშირებულ განცხადებებს ეხმაურება.

  • ბოლო ასეთი განცხადება ომის მე-15 წლისთავზე მოვისმინეთ.
  • ღარიბაშვილმა ძმათა სასაფალოზე ჯერ აგრესორი ქვეყნის ხსენების გარეშე ისაუბრა მსხვერპლზე, ტერიტორიების დაკარგვაზე, ოკუპაციაზე.
  • შემდეგ კი გააჟღერა აქამდე არაერთხელ გამოყენებული პროპაგანდა და "ომის აცილების" შესაძლებლობაზე ისაუბრა.
  • "მე მინდა დღეს აღვნიშნო, რომ, ჩვენ ეს არაერთხელ გვითქვამს, ამ ომის თავიდან აცილება იყო შესაძლებელი. ვიცი რა ის ინფორმაცია, რაც ხდებოდა, როგორ ვითარდებოდა მოვლენები, მინდა კიდევ ერთხელ აღვნიშნო, რომ ძალიან დიდი უპასუხისმგებლობა გამოიჩინა ყოფილმა მთავარსარდალმა".

სააკაშვილი წერს, რომ პასუხობს "ივანიშვილის მოლაპარაკე თავს", შეიძლებოდა თუ არა 2008 წლის ომის თავიდან აცილება და ამის 7 "წინაპირობას" ასახელებს, რასაც უცვლელად გთავაზობთ:

  • "აჭარაში ასლანი დაგვეტოვებინა და ხელი აგვეღო ბათუმის განვითარებაზე.
  • ძალოვანი სტრუქტურების ხელმძღვანელად მათი აგენტები უნდა დაგვენიშნა, როგორ ამას პირდაპირ მთხოვდა პუტინი.
  • არ უნდა შევბრძოლებოდით კორუფციას, რადგან ძირითადად მათ ეყრდნობოდა რუსული გავლენა საქართველოში.
  • არ უნდა გაგვეტარებინა არც ერთი რეფორმა, ვინაიდან რეფორმებს რუსეთი განიხილავს საშიშ პრეცედენტად.
  • არ უნდა გვევლო ევროკავშირისა და ნატოსკენ.
  • არ უნდა გვეთქვა უარი ენერგეტიკაში რუსულ სქემებზე და შესაბამისად, სიბნელეში დაგვეტოვებინა საქართველო.
  • არ უნდა შეგვექმნა ქართული არმია და სამხედრო წარმოება.
  • ერთი სიტყვით, დავჩენილიყავით ჩამორჩენილ, გაუბედურებულ, კრიმინალურ, კორუმპირებულ ქვეყნად, რომლის ბედი მსოფლიოში არავის დააინტერესებდა და რომელსაც რუსეთი ნებისმიერ დროს დამართებდა ყველაფერს, რასაც მოისურვებდა".