HBO-ს პოპულარული სერიალის, ეიფორიის, ვარსკვლავი ანგუს კლაუდი 25 წლის ასაკში გარდაიცვალა. ამის შესახებ განცხადება მისმა ოჯახმა გამოაქვეყნა. განცხადების მიხედვით, ანგუსს 1 კვირის წინ მამა გარდაეცვალა, რაც მსახიობისთვის განსაკუთრებულად მძიმე აღმოჩნდა. ჯერჯერობით გარდაცვალების მიზეზი ოფიციალურად დადასტურებული არ არის.

"ანგუსი ღიად საუბრობდა მენტალურ ჯანმრთელობასთან დაკავშირებულ პრობლემებზე და იმედი გვაქვს, რომ მისი გარდაცვალება სხვებს შეახსენებს, რომ მარტო არ არიან და ამ ყველაფერს მარტო და ჩუმად არ უნდა ებრძოლონ", — ვკითხულობთ განცხადებაში.

მსახიობის გარდაცვალებას HBO-ც გამოეხმაურა:

"ძალიან დამწუხრებული ვართ ანგუს კლაუდის გარდაცვალებით. ის HBO-ს და ეიფორიის ოჯახის ძვირფასი წევრი და განუზომლად ნიჭიერი ადამიანი იყო. ამ რთულ დროს მისი მეგობრებისა და ოჯახის წევრების მწუხარებას ვიზიარებთ".

ანგუსი ეიფორიაში ნარკოტიკებით მოვაჭრე ფეზკოს როლს ასრულებდა, რომლითაც მაყურებელს თავი ძალიან მალე შეაყვარა. აღსანიშნავია, რომ ანგუსი კასტინგის აგენტმა ქუჩაში შენიშნა — სწორედ ასე აღმოჩნდა ის თანამედროვეობის ერთ-ერთ პოპულარულ სერიალში.

კლაუდი ბოლო ინტერვიუებში მომავალ პროექტებზე აღფრთოვანებით საუბრობდა, თუმცა იმასაც ამბობდა, რომ ჰოლივუდურ წარმატებაზე მეტად გარკვეული დროის შემდეგ მშობლიურ მხარეში დაბრუნება უნდოდა.