ტეილორ სვიფტისთვის ახალ-ახალი რეკორდების დამყარება უცხო ნამდვილად არაა, თუმცა ბევრ მომღერალს ნამდვილად არ შეუძლია თქვას, რომ მისმა კონცერტმა 2,3 მაგნიტუდის მიწისძვრის ეკვივალენტური სეისმური აქტივობა გამოიწვია. დიახ, სწორად წაიკითხე. სიეტლის 2 კონცერტზე ფანებმა იმდენი იცეკვეს და იმღერეს, რომ პატარა მიწისძვრა, უფრო სწორად — "სვიფტისძვრა" გამოიწვიეს.

მეცნიერებმა "სვიფტისძვრა" სიეტლში 2011 წელს მომხდარ სეისმურ აქტივობას შეადარეს, რომელიც ფეხბურთის მატჩმა გამოიწვია, თუმცა, მათი თქმით, სვიფტის ფანების მიერ გამოწვეული რხევა ორჯერ უფრო ძლიერი იყო.

სიეტლში ფანების აქტიურობა არც სვიფტს გამორჩენია და მათ მადლობა ინსტაგრამზე გადაუხადა:

"გულწრფელად ვიტყვი, რომ სიეტლში ერთ-ერთი საუკეთესო შაბათ-კვირა გავატარე. მადლობა ყველაფრისთვის. მადლობა გამხნევებისთვის, კივილისთვის, ხტუნვისთვის, ცეკვისთვისა და ბოლო ხმაზე სიმღერისთვის", — წერს ტეილორი.

აშშ-ში სვიფტის ტური დასასრულს უახლოვდება. ამის შემდეგ ტეილორი კონცერტებს აზიისა და ევროპის ქვეყნებშიც გამართავს.